MJ Promete Rezolve Difikuldade Carro Célula iha Prizaun sira

Hatutan.com, (23 Juñu 2022), Díli– Carro Célula ka karreta ne’ebé fasilita transporte dadur sira iha prizaun atu bá halo tratamentu no partisipa iha julgamentu iha tribunál sira sai hanesan difikuldade ne’ebé Prizaun Becora, Gleno ho Prizaun Suai enfrenta.

Lee Mós : MJ Promete Sosa Fasilidade ba Konservatóriu Munisípiu Díli

Ministru Justisa, Tiago Amaral Sarmento. Foto/Mídia MJ

Ministru Justisa (MJ), Tiago Amaral Sarmento, Kinta (23/06/2022), halo vizita kortezia ida bá Prizaun Becora, Díli, hodi rona rasik difikuldade lubuk  ne’ebé prizaun sira enfrenta, liuliu relasiona ho transporte ne’ebé atu fasilita transporta dadur sira bá tuir julgamentu iha tribunál no bá halo tratamentu iha ospitál bainhira sira balun moras.

 “Iha estabelesimentu Prizaun Becora no Gleno, ha’u identifika problema barak, liu-liu transporte ka carro célula ne’ebé tula dadur bá tuir julgamentu, maibé sei tau atensaun hodi rezolve lalais,” Ministru Justisa Tiago Amaral Sarmento, bá jornalista sira hafoin remata vizita iha Prizaun Becora.

Relasiona ho difikuldade ne’e, daudaun ne’e MJ liu husi diresaun aprovizionamentu halo ona konkursu públiku no iha tempu badak situasaun refere sei rezolve.

Difikuldade seluk ne’ebé Prizaun Becora enfrenta maka menus promosaun bá  guarda prizionál, tanba servisu kleur ona ho nivel ki’ik maibé laiha promosaun. Tanba ne’e, MJ promete sei halo promosaun bá guarda prizionál iha tempu badak nune’e bele hadia’k liután sira-nia servisu.

Kona-ba kondisaun fatin bá dadur ne’ebé ho espasu ki’ik, MJ planeia halo prizaun boot iha Wedaberek, Munisípiu Manufahi ho rai ektare 800 ne’ebé aprezenta ona planu no dezeñu bá Ministériu Finansas (MF) no MF aseita maibé tenke tau iha orsamentu Jerál Estadu (OJE) 2023 nian.

Jornalista : Carmelita Isaac