Polítika
Governu Aprezenta Programa Prioridade 2023 Bá Ramos-Horta
Hatutan.com, (24 Juñu 2022), Díli- Primeiru-Ministru Interinu no Ministru Prezidénsia Konsellu Ministru (MPCM), Fidelis Leite Magalhães hamutuk ho Ministru Edukasaun Juventude no Desportu (MEJD), Armindo Maia, Ministru Ensinu Superiór Siénsia no Kultura (MESSK), Longuinhos dos Santos, Ministru Finansas (MF), Rui Gomes, Ministra Saúde (MS), Odete Maria Belo, ho Vise-Ministra Solidariedade Sosial no Inkluzaun (MSSI),Signi Chandrawati Verdial, Sesta (24/06/2022), hasoru malu ho Prezidente Repúblika (PR), José Manuel Ramos-Horta iha Palásiu Prezidensiál, hodi introdús programa prioridade VIII Governu nian iha 2023.
Lee Mós : PM Taur Matan Ruak Dezloka ba Singapura Hodi Hala’o Tratamentu Saúde
Primeiru-Ministru Interinu no Ministru Prezidénsia Konsellu Ministru (MPCM), Fidelis Leite Magalhães. Foto/Hatutan.com
Auzensia Primeiru-Ministru, Taur Matan Ruak nian no mós iha auzénsia husi Vise-Ministra na’in rua konforme despaxu Primeiru-Ministru hodi substitui Primeiru-Ministru interinamente hodi jere Governu nia lala’ok.
Parte Governu hetan komunikasaun husi Xefe Estadu, konvida Ministru Edukasaun Juventude no Desportu (MEJD), Ministru Ensinu Superior Siensia no Kultura (MESSK), Ministru Finansas (MF), Ministra Saúde (MS), no Vise Ministra Solidariedade Sosial no Inkluzaun (MSSI) atu bele hato’o prioridade sira Governu nian bá 2023.
“Ami mai hato’o ka relata kona-bá adiamentu ezekusaun no programa sira iha setór sosial, no setór ne’ebé relasiona ho dezenvolvimentu kapitál umanu to’o tinan ne’e ninia rohan, hahú husi Juñu agora to’o fim do ano hodi haree prioridade saida mak Governu hanoin ona iha tinan 2023,” Fidelis Leite Magalhães hateten bá jornalista sira.
Objetivu prinsipál husi sorumutuk ne’e mak atu iha diskusaun ida ho Xefe Estadu, no rona preokupasaun sira husi Xefe Estadu atu iha aliñamentu ne’ebé di’ak liu entre preokupasaun sira Xefe Estadu nian no programa sira ne’ebé Governu hatuur ona ka programa hirak ne’ebé Governu hanoin hela atu halo tinan oin mai.
Iha diskusaun ne’e foka liu bá asuntu sosial no dezenvolvimentu kapital umanu no komponente sira seluk iha programa VIII Governu nian, hanesan setór sira infraestrutura, setór ekonomia no setór sira boa Governasaun.
Implementasaun tinan ida ne’e no bainhira tinan ida ne’e remata Governu hato’o mos bá Xefe Estadu kona-bá intensaun Governu nian bá tinan oin ne’ebé barak mós hatuur ona iha programa grade opsaun ne’ebé aprova ona iha PN no promulgadu ona husi Xefe Estadu.
“Ita espera katak iha tempu fulan ida ka semana hirak oin mai, sei bele iha sinkronizasaun aliñamentu ne’ebé di’ak liu atu konversa ne’e bele kontinua no órgaun estadu sira ne’e servisu hamutuk atu lori dezenvolvimentu ne’ebé di’ak liu, saúde ne’ebé di’ak liu ba sidadaun Timor ninian,” Ministru Fidelis Magalhães tenik.
Polítika no programa setór sosial no dezenvolvimentu kapital umanu ne’ebé Governu planeia han malu ho filozofia Governu nian katak ema mak tenke sai sentru bá dezenvolvimentu tamba ne’e mak objetivu loloos husi polítika Governasaun ida ne’e nian.
Jornalista: Vito Salvador