PNTL Halo Apreensaun Bá Mina-rai Jerígen 103 ho Bidón-Ida

Hatutan.com, (24 Juñu 2022), Díli– Eskuadra Polísia Nasionál Timor Leste (PNTL) Postu Administrativu Dom Aleixo, Munisípiu Díli, Sesta (24/06/2022), purvolta tuku 08:30 Otl, halo  apreensaun bá mina-rai iha masa jerígen hamutuk 103 ho mina-rai iha bidón-ida (1) iha Aldeia São José Ai-metin Laran, Suku Comoro, Díli.  

Lee Mós : UPM Halo Apreensaun ba Mina-rai Tonelada Sia

Mina-rai ne’ebé PNTL halo apreensaun, Sesta (24/06/2022). Foto/Hatutan.com

Komandante PNTL Munisípiu Díli, Superintendente Xefe Henrique da Costa, informa, iha tuku 06:00 Otl, membru PNTL sira iha Postu Seguransa Tránzitu, besik Timor Plaza, hetan informasaun hosi komunidade sira kona-bá ema transporta mina-rai ho ilegál.

Hosi informasaun ne’e, membru sira informa kedan ba iha Delta Base, Sentru Komandu Munisípiu Díli nian, no informa direta bá iha Patrulla Dom Aleixo, hodi bá iha fatin ne’ebé maka identifika katak ema lori sasán ilegál tama.

“Ita-nia patrulla to’o iha ne’ebá, hetan duni karreta kamioneta ida, ne’ebé maka tula sasán hanesan mina-rai, hamutuk jerígen 103 ho mós bidón-ida  ne’ebé maka kuandu ita tau hamutuk karik revolta tonelada rua  (2). Depois ita nia patrulla informa kedas bá iha investigasaun munisípiu nian no agora polísia investigasaun Dom Aleixo atende hela,” Superintendente Xefe Polísia, Henrique da Costa, informa ba jornalista.

Durante prosesu apreensaun ne’e, PNTL identifika ona mós sidadaun na’in-tolu kompostu hosi mane nain-rua (2) no  feto-ida  (1) ho naran inisiál JGN, AdS, nu’udár uma-na’in, no sidadaun JF, hanesan kondutór kamioneta.

Sidadaun sira ne’e, PNTL suspeita nu’udár autór ne’ebé mak durante hala’o atividade negósiu mina-rai, ne’ebé maka hatama ho ilegálmente hosi fronteira rai-maran no tasi, hodi mai fa’an iha kapitál Dili.

“Suspeitu hamutuk na’in-tolu, ne’ebé mak agora daudaun ita nia parte investigasaun Dom Aleixo nian, halo hela prosesu. Ida ne’e remata, sei lori suspeitu mai detein iha ita-nia sela komandu munisípiu ninian, para atu nune’e bele finaliza prosesu ne’e, hodi aprezenta bá iha Ministériu Públiku,” komandante Henrique informa.

Evidénsia sira hanesan mina-rai ho kuantidade jerígen 103, mina-rai iha bidón ida (1), inklui karreta kamioneta ida ho xapa matrikula 57.971, PNTL asegura hotu ona iha Eskuadra Dom Aleixo.

Jornalista: Rogério Pereira Cárceres