PCIC lori arguidu sira ne’ebé deskunfia envolve iha kazu trafíku umanu bá TDD. Foto/Hatutan.com
Timoroan na’in-tolu ho inisiál MV, JG ho HdS, Policia Ciêntífica e de Investigação Criminál (PCIC) detein iha Kuarta (22/06/2022), ho baze bá “mandado de busca domiciliária e detenção” hosi Tribunál Distritál Díli.
Observasaun Hatutan.com iha TDD nota katak membru PCIC sira transporta arguidu na’in-tolu to’o iha resintu TDD, Mandarin, iha tuku 12:12 meiudia, no tama bá sala julgamentu iha tuku 12:35 Otl.
Audiénsia primeira interrogatóriu ne’e, prezide hosi juiz prosesu, Afonso Carmona, Ministériu Públiku (MP), reprezenta hosi Domingos Gouveia, no arguidu sira hetan asisténsia legál hosi defensór públiku, Humberto Alves no advogadu privadu Pedro Aparíçio.
Iha audiénsia dahuluk, parte juis sira halo de’it identifikasaun ka sumáriu bá arguidu sira, no suspende fali prosesu julgamentu bá iha tuku 14:30 loro-kraik, hodi rona medida koasaun husi TDD.