Hatutan.com, (30 Juñu 2022), Díli– Jornalista, xefe redasaun no na’in bá mídia online The Oecusse Post (TOP), Raimundos Oki, sai arguidu bá kazu violasaun segredu justisa relasiona ho publikasaun notísia sira kona-bá kazu Topu Honis iha Rejiaun Administrativa Espesiál Oé-Cusse Ambeno (RAEOA).
Ho astatu hanesan arguidu, Raimundos Oki, Kinta (30/06/2022), haleu tuku 09:00 Otl, nia bá presta ona deklarasaun iha Policia Ciêntífica e de Investigação Criminal (PCIC).
Notifikasaun bá inkéritu hosi PCIC bá jornalista Raimundo Oki ne’e, tanba simu delegasaun kompeténsia hosi Prokuradoria Jerál Repúblika (PGR-sigla Portugés) ka Ministériu Públiku (MP) ho Número Único Crime (NUC) 0054/21.PGGCC.
Jornalista The Oecusse Post (TOP), Raimundos Oki, hateten, PCIC liuhosi nia investigadór sira, kontakta bá nia katak, atu bá presta deklarasaun iha PCIC kona-bá Criminalidade Violente e Organizada ka halo violasaun bá segredu justisa, kona-ba kazu visum obrigatóriu hasoru labarik sira iha Topo Honis, ne’ebé TOP publika.
Advertisement
“Depois mai to’o iha PCIC, saida mak sira hatete bá ha’u katak, ministériu públiku delega kompeténsia bá iha PCIC, hodi halo prosesu investigasaun bá kazu ida naran Criminalidade Violente e Organizada. Mas ohin, konforme informasaun hosi investigadora katak, kona-bá kazu krime violasaun segredu justisa. No ikus mai, investigadóra hatete bá ha’u katak, sira konstitui ha’u nu’udár arguidu bá iha kazu violasaun segredu da justisa,” Raimundos Oki, hateten bá jornalista sira, hafoin hato’o nia deklarasaun bá investigadóra iha PCIC, Caicoli.
“Ha’u dehan, sé segredu justisa liga kazu kona-bá Visum Obrigatóriu bá labarik orfanatu sira Topo Honis, ha’u hanoin, buat hotu-hotu fó sai tiha ona bá públiku. Notísia eskrita, video, buat hothotu fó sai tiha bá públiku, ne’ebé ohin ha’u uza direitu, hili dalan nonook. Depois ita sei hein prosesu tuir mai, lahatene, sé bá to’o tribunál mak ita bele esklarese ba malu,” hateten Raimundo Oki.
“Ha’u lahatene konteúdu oinsá-oinsá, tanba ohin ha’u hili direitu nonok. Ne’ebé, aban-bainrua karik prosesa ba oin, ba prosesu julgamentu iha tribunál, depois mak ita foin hatene, violasaun segredu justisa oinsá-oinsá, mais ohin nia karta mak ne’e, konstitui ha’u nu’udár arguidu ba kazu violasaun segredu justisa,” Oki hateten tán.
Jornalista no na’in bá média online The Oecusse Post (TOP) ne’e afirma, ho notifikasaun hosi PCIC ne’e, hanesan sidadaun nia sempre koopera ho justisa.