Guarda Prizionál Reintegra Prizioneiru 118 ba Estabelesimentu Prizionál Suai

Hatutan.com, (02 Jullu 2022), Díli— Ministru Justisa (MJ) Tiago Amaral Sarmento, fó orientasaun ba Diretór Estabelesimentu Prizionál Suai, Júlio Dias Ximenes hodi koordena ho Administradór munisípiu, Polísia Nasionál Timor Leste (PNTL) no autoridade sira, hodi reintegra hikas prezu sira ba Estabelesimentu Prizionál Suai.

Prezu na’in 118 iha hela estabelesimentu prizionál Suai, Sábadu (02/07/2022). Foto/MJ.

Orientasaun ne’e Ministru Justisa fó bainhira hetan atualizasaun kona-bá kondisaun klimátika iha Munisípiu Covalima nian, Iha Sesta lorokraik.   

Lee Mós: Inundasaun, Prizioneiru 118 Okupa Provizóriu Aeroportu Suai

“Horsehik lorokarik hafoin hetan orientasaun hosi Ministru Justisa ha’u koordena kedan ho autoridade sira hodi reintegra hikas prezu na’in 118 ba estabelesimentu prizionál ho kondisaun di’ak hotu,” Hatutan.com sita deklarasaun Júlio Dias Ximenes iha komunikadu.

Prezu hirak ne’e husik hela aeroportu Suai no fila hikas ba estabelesimentu Prizionál iha tuku 17:30 Oras Timor Leste nian.

Prezu hika ne’e antes ne’e okupa provizoriu aeroportu Suai tanba inundasaun kauza hosi udan boot durante semana tomak iha parte munisipiu Kovalima.

Oras ne’e daudaun Majór Gusmão ho ninia ekipa hosi Sentru Integradu Jestaun Krize, iha hela Estabelesimentu  Prizionál Suai atu kompleta vasina doze datoluk ba prezu na’in 118.

Jornalista: Carmelita Isaac