Edukasaun
Osan Laiha, Projetu Sidade Universitáriu Aileu “Paradu”
Hatutan.com, (05 Jullu 2022), Díli-To’o oras ne’e, konstrusaun bá Sidade Universitáriu iha Aldeia Lauisi, Suku Bandudatu, Postu Administrativu Aileu, Munisípiu Aileu, “paradu” tanba Governu seidauk iha osan sufisiente. Ho nune’e, Governu sei buka hela dalan atu bele empresta tan osan hosi Banku Mundiál.
Lee Mós : Halo Manifestasaun iha MESSK, Tribunál Aplika Pena Multa Bá Universitáriu Na’in-17
Ministru Ensinu Superiór Siénsia no Kultura (MESSK), Longuinhos dos Santos. Foto/Hatutan.com
Ministru Ensinu Superiór Siénsia no Kultura (MESSK), Longuinhos dos Santos, hateten, andamentu progresu kona-bá harii Sidade Universitária Aileu, daudaun ne’e, Governu halo hela komunikasaun ho Banku Mundiál hodi bele empresta osan iha 2023, nune’e bele dezenvolve edifísiu foun bá sidade universitáriu ne’e.
“Iha faze diskusaun. Banku Mundiál mós presiza dokumentu ne’ebé mak mai hosi ministériu nian, liu-liu Sidade Universitáriu Aileu hanesan, kona-bá estudu viabilidade, dezeñu detalladu nian, depois ida ne’e, ita fó ona dokumentu ne’e bá sira totálmente, depois sira bele fó ona lampu azúl. Maibé, daudauk ne’e seidauk bele iha ida ne’e, tanba sei iha hela faze diskusaun,” Ministru Ensinu Superiór Siénsia no Kultura (MESSK), Longuinhos dos Santos, hateten bá jornalista sira, hafoin sorumutuk ho Primeiru-Ministru (PM), Taur Matan Ruak, iha Palásiu Governu, Díli, Tersa (05/07/2022).
Hatán kona-bá valór orsamentu hira mak Governu sei buka empresta tan hosi Banku Mundiál, Ministru Longuinhos dos Santos, hateten montante orsamentu seidauk fiksa, tanba oras ne’e, kompañia kontraktor ne’ebé mak responsabiliza bá obra ne’e, hala’o hela levantamentu fíziku sira kona-bá gastu nian iha terrenu, molok entrega bá Governu, nune’e mós aprezenta proposta empréstimu bá Banku Mundiál.
“Orsamentu ne’ebé maka atu bele investe bá Sidade Universitáriu Aileu, seidauk finaliza loloos, tanba iha hela prosesu aprovizionamentu hosi empreza bá Sidade Universitáriu Aileu no iha fulan-Jullu ne’e, sira finaliza atu aprezenta, nune’e nia montante orsamentu ita seidauk bele fiksa,” Ministru Longuinhos dos Santos, hateten.
Progresu konstrusaun fíziku bá obra ne’e rasik iha terrenu seidauk la’o, tanba Governu halo hela diskusaun ho Banku Mundiál, oinsá mak atu bele empresta osan ne’e.
Tuir planu MESSK nian katak, prosesu implementasaun loloos bá projetu konstrusaun edifísiu ne’e, iha fulan-Setembru 2022, hahú uluk ona konkursu públiku bá moru, molok konstrui edifísiu Sidade Universitáriu Aileu.
Kona-bá komunidade sira ne’ebé mak antes ne’e sira nia rai no hela fatin hetan afetadu hosi planu boot ne’e, Governu rezolve hotu ona sira ninia problema.
“Ne’e ita rezolve hotu ona, iha komunidade uma-kain haat ka lima hanesan ne’e maka seidauk bele konsege rezolve, maibé nia andamentu prosesu la’o hela,” Ministru Longuinhos informa tan.
Jornalista: Rogério Pereira Cárceres