Professór Barak Husik Hela Knaar ba Assume Kargu Xefia iha Instituisaun Seluk

Hatutan.com, (05 Jullu 2022), Díli—Prezidente Komisaun Funsaun Páblika (KFP), Faustino Cardoso Gomes preokupa ho professór barak ne’ebé husik hela sira nia knaar nu’udár manorin-na’in hodi ba assume fali kargu públiku hanesan Xefe Departamentu, diretór no administradór postu inklui Prezidente Autoridade munisípiu nian. 

Prezidente Komisaun Funsaun Públika, Faustino Cardoso Gomes. Foto/KFP.

Faustino Cardoso Gomes aprezenta ona situasaun ne’e ba Prezidente Repúblika (PR), José Ramos-Horta durante soru-mutu iha Palasiu Prezidensiál Bairru-Pité, Tersa (05/07/2022).

Lee Mós:Xefe Estadu Enkoraza KFP Servisu ho Imparsiál

“Ohin ami atualiza mós katak to’o ohin loron professór barak mak hetan transferénsia hodi ba asume kargu Xefia iha Ministériu sira hanesan iha Ministériu Administrasaun Estatál sai administradór postu, administradór Munisípais, Prezidente Autoridade,” Faustino Cardoso Gomes hateten.

Maski la temi númeru detallada, maibé parte KFP konsidera mudansa ne’ebé iha, bele implika ba direitu joven sira nian tanba lakon professór atu bele kontinua dezempeña.

Kona-bá situasaun ne’e, Faustino dehan Xefe Estadu tau atensaun boot ba professór sira, tanba Xefe Estadu dehan país ida atu sai avansadu tenke tau as papél professór sira nian.

Iha soru mutu ne’e KFP aprezenta kestaun rua ba Xefe Estadu ne’ebé sai atensaun KFP nian ida maka jestaun reforma no ida seluk kestaun voluntáriu.

Jornalista: Vito Salvadór