Hatutan.com, (09 Jullu 2022), Díli—Kada tinan, sarani Musulmanu sira iha mundu inklui Timor-Leste, selebra loron boot Idul Adha. Nune’e iha Sábadu, 09 jullu 2022 Sarani Musulmanu sira selebra loron importante ne’e, ba dala-1443 ho nia sentidu, sakrifísiu.
“Sentidu hosi Idul Adha ida-ne’e, mak sakrifísiu,” Xefe Fundasaun Annur Díli, Muhamad Anwar da Costa hateten ba jornalista sira, hafoin reza dadeer iha Masjid An-nur, Kampung Alor, Sábadu (09/07/2022).
Lee Mós:Antusiasme Warga Salat Idul Fitri di Masjid An-Nur
Iha selebrasaun boot Idul Adha ne’e, sarani Musulmanu sira ne’ebé iha posibilidade finanseira atu ba sai Haji, sira bele iha Indonézia no oras-ne’e mós balun konsentra ona iha ne’ebá, besik fulan ida resin ona.
Maibé sarani sira balun ne’ebé mak laiha posibilidade, sira bele selebra de’it loron Idul Adha ne’e, iha ida-idak nia fatin ka ida-idak nia nasaun.
“Depois de reza jerál dadeersan no kontinua ho oho animál, na’an sira ne’e ita fahe oitoan-oitoan ba ita nia komunidade kbi’it laek sira ne’ebé sira presiza, nune’e, sira mós bele kontente, sira mós bele selebra loron importante ida ne’e hamutuk ho ita,” Muhamad Anwar da Costa, esplika.
Molok tama ba selebrasaun loron importante ne’e, iha semana rua antes, sarani Musulmanu sira forma tiha ona ekipa komisaun organizadora ida, hodi bele responsábiliza ba atividade sira mak hanesan, reza jerál, sé mak sai Imam no sé mak sei fó palestra.
Hafoin reza ka orasaun dadeer nian, sira ne’ebé iha komisaun organizadora ne’e, hahú kolekta dadus ba komunidade sira ne’ebé mak laiha kbi’it, bele tama ba kategoria hodi hetan na’an.
Bainhira konklui dadus distribuisaun na’an ba komunidade ne’ebé mak atu simu apoiu na’an hirak ne’e, sei prepara mós fatin atu simu animál sira ne’e, karik hetan apoiu hosi sarani sira seluk, hanesan bibi ka karau, hafoin oho no sira fahe ba komunidade kbi’it laek sira.
“Lorloron ami reza nafatin dala-lima iha loron ida nia laran, mais reza jerál ohin hotu ona. Maibé, ita oho ka ko’a animál ne’e, depende ba karau ho bibi sira ne’e hamutuk hira, sé barak, entaun loron tolu ba oin sei ko’a nafatin. Kuandu oitoan, entaun loron ida de’it hotu ona,” Muhamad Anwar da Costa, esplika tán.
Xefe Fundasaun Annur Díli ne’e hato’o nia boas-festas Idul Adha ba komunidade Musulmanu sira hotu iha TL ne’ebé mak ohin selebra loron importante ne’e iha ida-idak nia fatin.
“Kontente loron ida-ne’e, karik ema iha posibilidade, bele oferese apoiu ba ita-nia maluk sira, ita nia komunidade sira, ita nia inan-aman sira ne’ebé laiha posibilidade, kbi’it la’ek, atu sira mós kontente, depois halibur hamutuk selebra loron Idul Adha hamutuk ho ita, pelumenus tinan ida dala-ida,” nia hateten.
Tuir dadus, totál sarani Musulmanu sira ne’ebé mak oras-ne’e iha TL hamutuk 5.000-resin. Maibé komunidade ne’ebé mak atu hetan na’an, iha 3.000-resin, alende iha kapitál Dili inklui mós iha munisipiu sira hanesan, Lospalos, Baucau no Viqueque.
Jornlaista: Rogério Pereira Cárceres
