Ramos-Horta Apoia Atividade MOKATIL Hadi’a Ekonomia Agrikultór iha Baze

Hatutan.com, (11 Jullu 2022), Díli- Prezidente Repúblika (PR), José Ramos-Horta, apoiu atividade Movimentu Kamponeza Timor Leste (MOKATIL) hodi hadi’a ekonomia agrikultór no mellora produsaun agríkola iha rai-laran.

Prezidente Repúblika, José Ramos-Horta. Foto/Hatutan.com

Xefe Estadu iha koñesimentu di’ak tebes bá atividade sira ne’ebé MOKATIL halo iha Timor-Leste liu-liu iha ámbitu luta kontra pobreza iha zona rural sira.

Xefe Estadu aproveita oportunidade ida ne’e hodi subliña mós katak Prezidénsia laiha kbiit finanseiru ne’ebé natoon atu finansia bá programa ka proposta sira ne’ebé tama, maibé Xefe Estadu sei re-enkamiña proposta no preokupasaun hirak ne’e bá Governu liu-liu ba iha ministériu sira ne’ebé komponente.

“Xefe Estadu sei buka mós dalan ka apoiu husi kooperasaun sira, husi Embaixada no ajénsia internasionál sira husi nasaun seluk hodi fó solusaun bá proposta sira ne’ebé ho karákter finanseiru hodi responde bá nesesidade sira ne’ebé organizasaun iha,” José Ramos-Horta haktuir bá delegasaun MOKATIL iha Palásiu Prezidensiál, Díli, Segunda (11/07/2022).

Xefe Estadu mós iha prontidaun totál atu servisu hamutuk ho MOKATIL iha atividade sira hotu no sei disponibiliza aan atu partisipa iha atividade hodi solidariza ho MOKATIL.

Prezidente MOKATIL, Helio Dias da Silva hateten, sira nia parte  reuniaun  ho Prezidente Repúblika hodi hato’o MOKATIL progresu no dezafiu sira ne’ebé durante ne’e MOKATIL enfrenta.

MOKATIL husu nafatin atu Xefe Estadu defende povu liu-liu kbiit laek sira no povu iha área rural tanba  povu maioria iha área rural moris husi vida agrikultór tanba ne’e mak MOKATIL mai husu atu Xefe Estadu fó atensaun maka’as bá setór produsaun sira.

Membru MOKATIL kuaze kontribui maka’as bá  programa sesta bázika tanba kuaze porsentu 70 produtu lokál iha sesta bázika sosa husi kamponeza sira membru MOKATIL nian.

Dezafiu ka problema bá MOKATIL mak sentru produsaun sira mak sai problema no indústria ne’ebé atu fasilita laiha tanba  kamponeza sira iha produtu maibé prosesa produsaun bá merkadu mak laiha.

MOKATIL preokupa governu notifika edifisiu KBH

Prezidente MOKATIL hateten liu husi enkontru ne’e, informa mós ba Xefe Estadu kona-ba edifísiu ne’ebé iha tempu ukun aan hanaran Knua Buka Hatene (KBH) ne’ebé ohin loron hetan notifikasaun husi parte Governu no MOKATIL sente ladún justu tanba notifikasaun ne’e hanesan atu halo presaun ba sidadaun sira ne’ebé oras ne’e uza fatin refere.

KBH fó formasaun bá juventude sira no sentru ida ne’e fó formasaun gratuita no halibur no simu inan-aman sira, povu kbiit laek sira no kuaze joven barak mak tuir formasaun lian Portugés, Ingles no Komputadór iha KBH.

KBH oras ne’e iha presaun nia laran husi Governu rasik tanba notifikasaun ne’ebé iha uza polísia, veteranu, no pesoál balun ne’ebé iha podér polítika tanba ne’e MOKATIL informa situasaun ne’e Xefe Estadu.

Jornalista: Vito Salvador