Xefe Estadu Nia Vizita ba Indonézia Importante

Hatutan.com, (11 Jullu 2022), Dili—Governu liuhosi Ministra Negósiu Estranjeiru no Kooperasaun (MNEK), Adaljiza Albertina Xavier dos Reis Magno, konsidera vizita Estadu hosi Prezidente Repúblika (PR) José Ramos Horta ba nasaun viziñu Repúblika Indonézia (RI), importante tebtebes tanba nasaun rua iha relasaun ne’ebé besik liu no presiza duni atu hametin relasaun ida-ne’e.

Ministra Negósiu Estranjeiru no Kooperasaun (MNEK), Adaljiza Albertina Xavier dos Reis Magno.

“Importante tebtebes atu Xefe Estadu ba vizita Indonézia, nomós mantein kultura ne’ebé mak iha ona,” Adaljiza Albertina Xavier dos Reis Magno hateten hafoin sorumutu ho Primeiru Ministru, Taur Matan Ruak iha Palásiu Governu, Dili, Segunda (11/07/2022).

Timor-Leste iha ona mós nia kultura ida katak, kada Xefe Estadu ne’ebé hafoin toma posse, hahú kedan hosi 2002 to’o agora tenke hala’o uluk nia vizita ba Indonézia, molok vizita ba País sira seluk.

“Tanba ita fó importánsia ba istória no mós proximidade ne’ebé mak ita iha ho Indonézia,” Adaljiza  hateten.

Maski tuir lei TL katak, bainhira vizita Xefe Estadu ida nian ba rai estranjeiru ruma, tenke hetan aprovasaun hosi deputadu sira iha Parlamentu Nasionál (PN) no MNEK garante katak PN sei aprova.

“Ha’u fiar sei iha autorizasaun. Imi hatene liu fali ha’u,” Ministra ne’e hatutan.

Tuir planu, iha Sesta 15 Jullu 2022 , MNEK Adaljiza sei dezloka uluk ba Indonézia, hodi hasoru-malu ho nia omólogu Ibu Rethno, molok Xefe Estadu Ramos-Horta ho komitiva to’o.

“Ha’u ba Tuir Prezidente Repúblika iha vizita seguinte, mais ha’u vizita Indonézia hotu, ha’u fila ona. Prezidente iha vizita seluk, mais ha’u fila uluk,” Adaljiza informa.

MNEK ninia dezlokasaun antes ba Indonézia hodi hasoru malu ho Ibu Rethno ne’e atu ko’alia kona-bá kooperasaun bilaterál entre nasaun rua, nune’e mós kona-bá TL ninia kandidatura ba konsellu direitus umanus nian.

“Nomós atu hatete kona-bá negosiasaun fronteiras terrestre ho marítima nian ne’ebé lídera hosi Maun Xanana, nomós asuntu seluk tán, retoma fila-fali ita nia reuniaun tinan-tinan, hosi senior ofisiál sira ne’ebé mak paradu tiha tanba Covid-19, ita bele kontinua fila-fali,” nia hateten tán.

Durante sorumutu ho PM Taur Matan Ruak, Adaljiza Albertina Xavier, informa liu-liu kona-bá MNEK nia preparasaun ba vizita PR Ramos-Horta nian ba Indonézia, iha tempu besik.

Jornalista: Rogério Pereira Cárceres