UPF Detein Timor-oan Na’in-Haat Hatama Gazolina Ilegál

Hatutan.com, (13 Jullu 2022), Díli—Polisia Nasionál Timor Leste (PNTL), Unidade Patrullamentu Fronteira (UPF), liu hosi Servisu Seksaun Sekreta, halo vizilánsia no kontrolu iha área fronteira, konsege kaptura timor oan feto na’in-haat ne’ebé hala’o transaksaun ilegál ba kombustível iha área Mota-Ain fronteira entre Timor-Leste ho Indonézia.

Timoroan feto na’in-haat ne’ebé hala’o transaksaun ilegál ba kombustível iha área Mota-Ain fronteira entre Timor-Leste ho Indonézia, Kuarta (13/07/2022). Foto/PNTL.

“Iha oras tuku sia kalan ita nia membru Servisu Sekreta hala’o kapturasaun ba ita nia sidadaun feto na’in-haat ne’ebé mak komete krime transaksaun ilegál hosi Atambua mai Timor-Leste ba kombustível tipu Gazolina jerigen 20ltr hamutuk 29 no 5ltr iha hitu, no sira halo kapturasaun iha área TCL 12 Suku Batugade,” Hatutan.com sita deklarasaun Komandante UPF, Superintendente Polisia, Euclides Belo iha komunikadu, Kuarta (13/07/2022).

Lee Mós: Transaksaun Ai Kameli Ilegál Iha Fronteira

Sidadaun na’in-haat ne’e UPF halo ona identifikasaun no termu entrega ba iha Esquadra PNTL Batugade hodi halo prosesu kontinuasaun.

“Iha prosesu identifikasaun ne’e ita identifika sidadaun feto na’in haat ho inisial CM tinan 50, husi Aldeia Lotan, Suku Leohitu maibé hela iha Mota-Ain, Suku Batugade, ALP tinan 18, hosi aldeia Leohitu, Suku Leohitu no hela iha Mota Ain. Enkuantu iha mós sidadaun feto na’in-rua ne’ebé halo kazamentu mista ho timor oan mak YMB, sidadaun Indonézia tinan 31 hosi Suku Dolaus, Atambua-NTT, no AV sidadaun Indonézia tinan 31 husi Suku Salore, Atambua-NTT,” Euclides Belo hateten.

UPF entrega ona sidadaun sira hamutuk ho evidénsia ba Komandu Esquadra PNTL Batugade, hodi kontinua ba prosesu investigasaun no sei prosesa tuir lei ne’ebé vigoro iha ita nia nasaun.

Jornalista: Rogério Pereira Cárceres