Justisa & Krime
Projetu PFMO Sei Fó Asisténsia ba CAC iha Área Prevensaun Korrupsaun
Hatutan.com, (14 Jullu 2022), Díli—Projetu PFMO-C2 “OSAN POVU NIAN, JERE HO DI’AK ne’ebé co-finansiadu hosi Uniaun Europeia (UE) no Instituisaun Camões IP, sei fó asisténsia ba Comissão Anti-Corrupção (CAC) iha área formasaun espesializada investigasaun kriminál no prevensaun korrupsaun nian.
Komisáriu CAC Sérgio Hornai akompaña hosi Komisáriu Adjuntu ba Asuntu Investigasaun Kriminál, Augosto Castro ho estrutura Espesialista Anti-Korrupsaun (EAK) Diresaun Servisu Apoiu no Kooperasaun (DSAK) nian hala’o sorumutu ho reprezentante Projetu PFMO-C2 “OSAN POVU NIAN, JERE HO DI’AK” Hugo Lourenço iha Salaun Sorumutu CAC Faról Díli, Kinta (14/07/2022). Foto/CAC.
Asisténsia ne’e ho objetivu bele hametin prinsípiu boa-governasaun, inspesaun, monitorizasaun transparánsia, responsabilizasaun, auditória, akuntabilidade no integridade iha Timor-Leste (TL).
Lee Mós:UNODC Sei Tulun CAC Hametin Sistema Judisiál iha Estadu TL
Atu realiza kooperasaun n’e maka Komisáriu CAC Sérgio Hornai akompaña hosi Komisáriu Adjuntu ba Asuntu Investigasaun Kriminál, Augosto Castro ho estrutura Espesialista Anti-Korrupsaun (EAK) Diresaun Servisu Apoiu no Kooperasaun (DSAK) nian hala’o sorumutu ho reprezentante Projetu PFMO-C2 “OSAN POVU NIAN, JERE HO DI’AK” Hugo Lourenço iha Salaun Sorumutu CAC Faról Díli, Kinta (14/07/2022).
“Rezultadu sorumutu loron ohin nian maka, atu Projetu PFMO fó asisténsia mai CAC iha área formasaun espesializada investigasaun kriminál no prevensaun korrupsaun nian ho objetivu bele hametin prinsípiu boa-governasaun, inspeksaun, monitorizasaun transparánsia, responsabilizasaun, auditória, akuntabilidade no integridade iha Timor-Leste,” Hatutan.com sita komunikadu.
Sorumutu ida-ne’e hanesan kontinuasaun ba kooperasaun entre Projetu PFMO nian ho instituisaun CAC nian ne’ebé hala’o tiha ona tinan hirak nian laran.
Projetu PFMO ida-ne’e implementa iha TL ba instituisaun publiku, Parlamentu Nasionál (PN), liñas ministeriais, órgaun komunikasaun sosiál, Tribunál das Contas no sosiedade sivíl sira iha ne’ebé benefisia ona Timor oan ka servidór povu hamutuk na’in 2.450.
Projetu PFMO-C2 ne’e co-finansiadu hosi UE no Instituisaun Camões IP ho totál orsamentu millaun 12,5 Euro, ekivalente millaun $15,2.
Jornalista: Carmelita Isaac