Patrimóniu Estadu 14 Movimentu La’ós iha Oras Servisu

Hatutan.com, (15 Jullu 2022), Díli—Ekipa operasaun no fiskalizasaun konjunta, liuhosi pasa revísta iha Kinta 14 jullu 2022, halo apreensaun ba evidénsia sira patrimóniu Estadu nian 14 besik estrada ibun Portu Dili nian, tanba hala’o movimentu “for a” hosi oras servisu.

Ekipa operasaun no fiskalizasaun konjunta, liuhosi pasa revísta iha Kinta 14 jullu 2022, halo apreensaun ba evidénsia sira patrimóniu Estadu nian 14 besik estrada ibun Portu Dili nian, tanba hala’o movimentu “fora” hosi oras servisu. Foto/PNTL.

Ekipa konjunta ne’e kompostu hosi Diresaun Jerál ba Jestaun Patrimóniu Estadu (DJJPE), Comissão da Função Pública (CFP), Comissão Anti Corrupção (CAC), Diresaun Nasionál ba Transporte Terrestre (DNTT) ho Polísia Nasionál Timor-Leste (PNTL) parte Unidade Tránzitu no Seguransa Rodoviáriu.

Lee Mós: Tránzitu Hein Hela Na’in ba Patrimóniu Estadu Ne’ebé Prende Iha Fim de Semana

“Ekipa konjunta halo pasa revista ba karreta ho motór governu nian ne’ebé mak sirkula fora hosi oras servisu ninian iha área Palásiu Governu nia sorin no preende evidénsia karreta governu 10, motór governu haat, ho dokumentus tolu,” Komandante PNTL Munisípiu Díli, Superintendente Xefe Polísia, Henrique da Costa hatete iha Komandu Díli, Sesta (15/07/2022).

Durante pasa revísta ne’e, ekipa fiskalizasaun no operasaun konjunta, identifika mós katak iha motorista balun mak sira nia karta kondusaun inválidu, inklui dokumentu sira motór nian mós balun inválidu ka liu ona prazu no seidauk ba halo renovasaun iha DNTT.

Hafoin halo apreensaun ba evidénsia sira-ne’e, parte PNTL liuhosi unidade Tránzitu Munisípiu Díli pasa kedan billete multa nian ba infartór sira, nune’e bele lori ba selu iha banku molok foti fila-fali sira-nia karreta ka motorizada ne’ebé preende.

Evidénsia sira ne’ebé preende, daudaun ne’e estasiona hela iha Diresaun Jerál ba Jestaun Patrimóniu Estadu (DJJPE), atu kontinua prosesu no parte ekipa CAC nian mak sei haree kona-bá elementu sira krime nian.

Hosi parte tránzitu munisipiu Dili ninian maka, aplika multa ba karreta ka motór ne’ebé mak dokumentus inválidu ka karta kondusaun laiha ka inválidu.

Jornalista: Rogério Pereira Cárceres