AJAR Lori Timoroan 200 iha Indonézia Hasoru Família iha Timor-Leste

Hatutan.com, (18 Jullu 2022), Díli-Hahú iha tinan 2014, Asia Justice and Rights (AJAR) servisu hamutuk ho Centro Nacional Chega (CNC) lori ona Timoroan hamutuk 200 husi Indonézia hodi hasoru malu ho família iha Timor.

Diretór AJAR, José Luis Oliveira. Foto/Hatutan.com

Timoroan hirak-ne’e iha tempu okupasaun Indonézia sira sai hanesan TBO (Tentara Bantuan Operasi) bá militár  Indonézia no balun militár sira hakiak bainhira sei otas ki’ik.

“Servisu konkretu ne’ebé ami halo komesa iha tinan 2014 maka ajuda CNC hodi buka labarik ne’ebé lakon durante tempu pasadu, hodi fasilita sira hasoru família ho nune’e tuir dadus ne’ebé iha hahú iha tinan 2014 to’o ohin loron, ami konsege hetan ema hamutuk 200 no hirak ne’ebé ami fasilita hasoru ona família iha 80-resin no iha tinan ida ne’e fulan-Outubru, ami planeia lori ema na’in-30 ne’ebé verifika ona hodi lori mai Timor halo reúne ho sira nia família, maibé daudaun iha faze trata sir- nia dokumentu viajen inklui vasina, tanba iha Indonézia vasina dala tolu maka foin bele lao,” Diretór AJAR, José Luis Oliveira bá Hatutan.com hafoin partisipa semináriu nasionál ho tema importánsia justisa tranzitóriu bá dezenvolvimentu nasionál iha ámbitu komemorasaun aniversáriu CNC bá dala-V iha Balide, Segunda (18/07/2022).

Nia esplika, la fasil buka ema Timoroan hirak ne’e tanba maske hela iha Indonézia, maibé maioria iha pesantren no panti asuhan tanba militár indonézia lori bá husik de’it la’ós hakiak tanba ekonomikamente labele sustenta.

Meius ne’ebé AJAR halo maka buka sira-nia dadus liu husi rede ka media sosiál tanba sira laiha dokumentu ofisial tantu KTP no seluk-seluk tan ho nune’e presiza tempu naruk hodi lori sira mai Timor hamutuk ho família.

Tuir dadus husi CAVR ema ka labarik ne’ebé lakon durante okupasaun Indonézia hamutuk 4000-liu.

Jornalista : Carmelita Isaac