Hatutan.com, (19 Jullu 2022), Díli— Autoridade Comissão Anti Corrupcão (CAC) hamutuk ho Unidade Informasaun Finanseira (UIF) ne’ebé tutela ba Banco Central Timor Leste (BCTL), hametin liu tán liña koordenasaun iha luta kolektiva ba prenvensaun no kombate korrupsaun iha Timor Leste.
Komisáriu Sérgio Hornai akompaña hosi Komisáriu Ajuntu ba Asuntu Investigasaun Kriminal Augosto Castro ho Diretora-Ezekutiva UIF, Maria de Jesus Sarmento iha Sala Gabineti Komisáriu Faról Díli, Tersa (19/07/2022). Foto/CAC.
Autoridade hosi instituisaun kompetente rua ne’e realiza ona enkontru liu hosi Komisáriu Sérgio Hornai akompaña hosi Komisáriu Ajuntu ba Asuntu Investigasaun Kriminal Augosto Castro ho Diretora-Ezekutiva UIF, Maria de Jesus Sarmento iha Sala Gabineti Komisáriu Faról Díli, Tersa (19/07/2022).
“Objetivu prinsipál hosi sorumutu kortezia ne’e atu hametin lasu amizade no liña koordenasaun servisu entre instituisaun Estadu rua iha luta kolektiva Timoroan sira nian iha prevensaun no kombate kriminalidade korrupsaun nian,” Hatutan.com sita komunikadu.
Advertisement
UIF nu’udár unidade prinsipál ida iha Banco Sentral Timor-Leste ne’ebé hala’o servisu importante hodi kontrola kualkér transaksaun finanseira iha rai laran no ba rai liur nian, atu prevene aktu brankamentu kapitál no finansiamentu terorizmu, nune’e mós kriminalidade korrupsaun ne’ebé sai ameasa transnasionál.
Finalidade hosi sorumutu kortezia ne’e atu hametin liña koordenasaun servisu di’ak ne’ebé durante instituisaun Estadu rua formaliza no implementa ona iha Memorandum of Understanding (MoU) hodi enrikesa prosesu analiza informasaun finanseira ba prátika fase osan iha kontekstu nasionál no internasionál.