Hatutan.com, (19 Jullu 2022), Bogor—Timor Leste ho Indonézia konkorda ona atu haforsa konektividade hosi terrestre no maritima, ba parte terrestre ne’ebé sei realiza rute bús trans diresaun Kupang-Díli no ba maritima sei loke rute ró kupang-Díli, iha tempu badak.
Prezidente Joko Widodo ho Prezidente José Ramos-Horta iha Palásiu Prezidensiál, Bogor, Tersa (19/07/2022). Foto/Média PR.
Konektividade ne’e legaliza ona liu hosi asina Memorandum of Understanding (MoU) hosi Ministru Transporte Komunikasaun, José Agostinho da Silva, ho nia omólogu iha área transporte terrestre no marítima ne’ebé asiste direta hosi Prezidente Repúblika Indonézia Joko Widodo no Prezidente Repúblika Timor Leste José Ramos-Horta, iha ámbitu vizita ofisál iha Palásiu Prezidensiál Bogor, Tersa (19/07/2022).
“Ita fó-hanoin atu halais konetividade terrestre liu hosi ligasaun autokarru ka bís Kupang-Dili no importánsia konetividade Marítima ho operasaun Ro-Ahi, Kupang, Dili no Darwin, Austrália,” Jokowi hateten iha deklarasaun ba imprensa hafoin enkontru.
Advertisement
Alende ne’e, parte rua konkorda atu haforsa dezenvolvimentu fronteira no iha esperansa katak, dezenvolvimentu fronteira Napan sei finaliza iha tinan ida-ne’e, enkoraza atu bele re-ativa hikas joint comitte.
Jokowi iha komitmentu boot atu apoia Timor Leste iha ninia dezenvolvimentu infraestrutura liuliu enkoraza atu nasaun rua rezolve invesment agrement tanba investimentu Indonézia nian oras ne’e daudaun iha Timor Leste atinje ona $818.000.000 iha área bankária.