Kada Loron Pesoál Serbisu Migrasaun Hetan Subsídiu ba Alimentasaun $10

Hatutan.com (20 Jullu 2022) Díli—Konsellu Ministru aprova ona Dekretu Governu ne’ebé aprezenta hosi Ministru Interiór, Taur Matan Ruak no Vise-Ministru Interiór, António Armindo, kona-bá subsídiu diáriu alimentasaun ba ofisiál sira Servisu Migrasaun nian kada loron hetan $10.

Diresaun Jerál Servisu Migrasaun realiza programa kompetisaun sertame ba membru diresaun sivíl no PNTL iha salaun atendimentu Ministériu Interiór, Vila-Verde, Segunda (15/11/2021). Foto/PNTL.

“Projetu Dekretu Governu ida-ne’e atu fiksa valór diáriu no konsekuentemente regula pagamentu subsídiu ida-ne’e nian, hanesan prevee iha Estatutu Pesoál Servisu Migrasaun, nune’e uniformiza ho valór subsídiu alimentasaun nian ne’ebé prevee iha rejime remuneratóriu sira Forsa Defeza Seguransa nian.  Valór diáriu hosi subsídiu ne’ebé define iha diploma ida-ne’e hanesan dolar norte-amerikanu sanulu,” Hatutan.com sita komunikadu hosi Konsellu Ministru ordinária iha Palásiu Governu, Dili, Kuarta (20/07/2022).

Konsellu Ministrus mos delibera ona hodi autoriza Ministru Finansas, Rui Augusto Gomes, atu selebra Akordu Finansiamentu ho Banku Mundiál (Asosiasaun Internasionál Dezenvolvimentu) ba projetu fornesimentu bee iha Dili. Akordu ida-ne’e ho objetivu atu halo kontratasaun empréstimu ida ho valór besik dolar amerikanu millaun 121, ho períodu maturidade tinan 40, hodi finansia projetu fornesimentu bee iha Dili. Programa ne’e sei dezenvolve liuhusi finansiamentu ho durasaun tinan hitu no komponente tolu, ba komponente dahuluk refere ba dezenvolvimentu infraestrutura sira abastesimentu bee nian, komponente daruak nian kona-ba hadi’a kapasidade institusionál servisu sira ba setór ida-ne’e no datoluk hadi’a jestaun projetu sira.

Halo aprovasaun mós ba projetu Dekretu-Lei, ne’ebé aprezenta husi Ministru Finansas, ba alterasaun dahuluk Dekretu-Lei n. 30/2011, loron 27 fulan-jullu, kona-ba kondisaun no prosedimentu sira atu observa kona-ba importasaun veíkulu motorizadu sira. Liu ona tinan sanulu kona-ba aprovasaun diploma ida-ne’e, hatudu duni nesesidade atu introdús kondisaun sira ne’ebé ezijente liu ba importasaun veíkulu no kontrola efikás liu ba operasaun importasaun nian, atu asegura protesaun konsumidór no meiu ambiente. Ba efeitu ida-ne’e, projetu Dekretu-Lei daudaun ne’e hakarak akresenta bandu importasaun motorizada no veíkulu lijeiru ba pasajeiru sira no mistu [karreta ne’ebé tula pasajeiru no sasán merkadoria nian] ne’ebé la kumpre kondisaun téknika sira sirkulasaun iha territóriu nasionál no kria rejime kontraordenasionál ida hodi kastigu ba sira ne’ebé la kumpre regra ne’ebé tau iha diploma ida-ne’e. Hakarak mós simplifika prosedimentu importasaun veíkulu sira, ho eliminasaun autorizasaun prévia no konsentra ba verifikasaun rekizitu legál sira importasaun nian iha momentu ida de’it, hodi nune’e, fasilita importasaun veíkulu sira tuir lei.

Ministru Prezidénsia Konsellu Ministrus, Fidelis Manuel Leite Magalhães, aprezenta ona opsaun polítiku-lejizlativa ne’ebé sai baze ba kriasaun rejime remuneratóriu ba titulár órgaun sira Administrasaun Indireta Estadu nian, ne’ebé buka atu estabelese remunerasaun ne’ebé aliña tuir kritériu objetivu sira, atu asegura, posivel liu, interese públiku no tratamentu hanesan ba situasaun ne’ebé hanesan.

Ikusliu, Vise-Ministru Negósiu Estranjeiru no Kooperasaun, Julião da Silva, halo ona aprezentasaun ida kona-ba prosesu kandidatura Timor-Leste nian ba Konsellu Direitus Umanus Nasoins Unidas nian ba períodu tinan 2024-2026. Karik eleitu, ida-ne’e sai hanesan dahuluk ba Timor-Leste halo parte ba membru konsellu direitus umanus, ne’ebé kontribui ba promosaun direitus umanus nian liuhusi respeitu mutu no diálogu. Promosaun no protesaun husi direitus umanus hanesan prioridade ba Timor-Leste, tantu hanesan nivel nasionál, hanesan internasionál.

Jornalista: Rogério Pereira Cárceres