Ramos-Horta ho SBY Ko’alia Relasaun Bilateral To’o Kestaun Sira Internasionál

Hatutan.com, (20 Jullu 2022), Jakarta-Prezidente Repúblika Timor-Leste, José Ramos-Horta, tersa meiudia (19/07/2022), hasoru malu ho antigu Prezidente Repúblika Indonézia, Susilo Bambang Yudhoyono (SBY) iha nia rezidénsia iha Cikeas, Bogor, Indonézia.

Lee Mós : Muhammadiyah Apoia Timor-Leste Nia Adezaun Bá ASEAN

Prezidente Repúblika Timor-Leste, José Ramos-Horta hasoru malu ho eis Prezidente Indonézia, Susilo Bambang Yudhoyono. Foto/Dok.Partidu Demokratiku Indonézia

Iha hasoru malu ne’e, Prezidente Repúblika Indonézia nian bá da-6 ne’e akompaña husi Prezidente Partidu Demokrátiku, Agus Harimurti Yudhoyono (AHY) ho mons antigu Vise Ministru Negosiu Estranjeiru, Dino Patti Djalal.

Nota imprensa ne’ebé Hatutan.com asesu, Kuarta (20/07/2022), relata katak iha hasoru malu ba dahuluk nian  ne’e, SBY hato’o parabens no apresiasaun boot bá José Ramos-Horta ne’ebé eleitu nu’udár Prezidente Repúblika Timor-Leste nian iha fulan-Abríl liubá.

“Parabéns. Ida-ne’e mandatu ida forte tebes ne’ebé Timor-Leste fó hela bá ita-boot atu lidera Timor-Leste iha tinan-lima ne’e (2022-2027),” SBY haktuir.

Iha enkontru ne’e, SBY ho Ramos-Horta ko’alia kestaun sira internasionál nian, inklui  relasaun bilateral Repúblika Indonézia ho Timor-Leste.

Iha okaziaun ne’e, SBY oferese prenda pintura ne’ebé SBY rasik mak pinta ho nia títulu “The Ocean of Peace and Friendship” bá Ramos-Horta hanesan forma amizade.

“Ha’u oferese bá ita-boot, pintura ida-ne’e nu’udár símbolu amizade ita-nian, povu Indonézia ho povu Timor-Leste. Pintura ne’e ha’u foin pinta hotu, horiseik,” SBY hateten.

Jornalista : Vito Salvador