Governu ho Parseiru Define Prioridade Dezenvolvimentu Seitór Turizmu

Hatutan.com, (25 Jullu 2022), Díli—Ministériu Finansas (MF), Ministériu Turizmu, Komérsiu no Indústria (MTKI), no Ministériu Koordenadór Asuntu Ekonómiku (MAKE), parseria ho USAID’s Tourism for All project, realiza workshop kona-bá lista prinsipál projetu Parseria Públiku-Privada (PPP, sigla Inglés) iha setór turizmu.

Ministériu Finansas (MF), Ministériu Turizmu, Komérsiu no Indústria (MTKI), no Ministériu Koordenadór Asuntu Ekonómiku (MAKE), parseria ho USAID’s Tourism for All project, realiza workshop kona-bá lista prinsipál projetu Parseria Públiku-Privada (PPP, sigla Inglés) iha setór turizmu, Ministériu Finansas, Aitarak Laran, Segunda (25/07/2022). Foto/Media MF.

“Objetivu prinsipál maka parte rua atu diskute kona-bá prioridade projetu ho modalidade PPP ba dezenvolvimentu setór turizmu iha Timor-Leste (TL),” Xefe Misaun USAID iha Timor-Leste, Zema Semunegu hateten.

Zema Semunegu  ko sidera Definisaun prioridade seitór turizmu importante tebes atu bele kontribui ba sustentabilidade reseitas ekonomia nasaun ida nian.

Nune’e mós Vise-Ministru Finansas, António Freitas hateten, Workshop ne’e importante tebes ba Parseiru sira atu diskute ho Governu nune’e bele konkorda hamutuk hodi bele avansa ho prioridade  balun ne’ebé sei realiza iha kurtu-prazu ba kontribuisaun reseitas ekonomia Timor-Leste nian.

“Hodi naran Oitavu Governu Konstitusionál, ha’u hakarak hato’o apresiasaun sinseru ba USAID’s Tourism for All Project ne’ebé sempre kolabora ho parte Governu ho sira-nia hanoin di’ak sira atu kontribui ba dezenvolvimentu setór turizmu iha Timor-Leste,’’ nia agradese.

Durante ne’e, tékniku sira hosi liña ministériu relevante servisu hamutuk ona hodi identifika prioridade PPP hamutuk 12 ne’ebé inklui ona iha lista prinsipál ne’ebé presiza diskute entre ministériu relevantes sira molok iha desizaun koletiva atu dezenvolve prioridade hirak ne’e hodi kontribui ba reseitas ekonomia Timor-Leste.

Lista projetu PPP iha setór turizmu mak hanesan: Ataúro Eco-Lodge, Aviasaun Doméstika no Internasionál, Bee-Manas Marobo, Konsesaun Ferry, Prezervasaun Istóriku Prizaun Ai-Pelu, Parke Nasionál Nino Konis Santana, Re-Investimentu Pousada sira no Jestaun, Sítiu Turístiku Ramelau, Sítiu Turístiku Matebian, Sítiu Turístiku One Dollar Beach, Sentru Konvesaun Díli no Sentru Arte no Kultura no ikus liu mak Sistema Bisikleta Públiku iha kapitál Díli.

Planu Estratéjiku Dezenvolvimentu (PED) 2011-2030 mak baze ba Programa Oitavu Governu Konstitusionál hodi identifika infraestrutura sira hanesan estrada, ponte, bee mo’os no saneamentu, eletrisidade, portu, aeroportu no telekomunikasaun hanesan investimentu estratéjiku. Atu bele alkansa objetivu sira ne’e, PED mós define modalidade ida ba investimentu estratéjiku mak PPP.

Desde tinan 2014, Governu Timor-Leste hahú opta ona modalidade PPP no Ministériu Finansas hahú estabelese ona Unidade PPP, prepara Lejislasaun sira no rekruta funsionáriu ho kapasidade tékniku ba Unidade PPP refere.

Esforsu hirak ne’e hotu atu garantia katak projetu PPP hotu tenke implementa ho kualidade ne’ebé aas hodi bele fó retornu ekonómiku, finanseiru no sosiál ne’ebé di’ak ba Timor-Leste.

Jornalista: Rogério Pereira Cárceres