Polítika
2022, ABC Sei Kapasita PN iha Área Relasaun Públika no Komunikasaun
Hatutan.com, (03 Agostu 2022), Díli— Agencia Brasileira de Cooperação (ABC), kontinua iha komitimentu hodi fó apoiu ba Parlamentu Nasionál (PN) liuliu iha kapasitasaun rekursu umanu.
Sekretáriu-Jerál Parlamentu Nasionál, Adelino Afonso de Jesus, iha reuniaun ho Embaixadór Brazil, Maurício Medeiros de Assis, Kuarta (03/08/2022). Foto/Média PN.
Embaixadór Brazil iha Timor-Leste, Maurício Medeiros de Assis, hateten Brazil hanesan nasaun ida ne’ebé belun di’ak liu Timor-Leste hodi apoia dezenvolvimentu iha área rekursu umanu no seluk tán iha Timor-Leste liu hosi kooperasaun oioin.
Lee Mós: Governu Aprova Proposta Alterasaun Lei Eleitorál ba Parlamentu Nasionál
“Tanba ne’e, ho Parlamentu Nasionál ba tinan 2022 sei halo kooperasaun liu ABC sei fó apoiu ba kapasitasaun iha área Takigrafia no relasaun publika no komunikasaun,” Hatutan.com sita deklarasaun Maurício Medeiros de Assis iha komunikadu, Kuarta (03/08/2022).
Sekretáriu-Jerál Parlamentu Nasionál, Adelino Afonso de Jesus, iha reuniaun ho Embaixadór Brazil, expresa sentimentu kontente no agradese ba kooperasaun ABC, hodi kapasita rekursu umanu Parlamentu Nasionál nian.
Sekretáriu-Jerál promete katak, tékniku sira iha Parlamentu Nasionál ne’ebé sei tuir formasaun iha área hirak ne’ebé mensiona sei aproveita di’ak ba servisu Parlamentár nian.
Jornalista: Carmelita Isaac