Ekipa Mane TL Empata ho Arábia Saudita Iha Olimpiade Xadrez Mundiál

Hatutan.com, (08 Agostu 2022), Díli— Tama ba ronde da-IX Olimpiade Xadrez Mundiál, ekipa mane Timor-Leste (TL) empata ho ekipa husi Arábia Saudita.

Ekipa mane TL Tama ba ronde da-IX Olimpiade Xadrez Mundiál. Foto/Federasaun.

Rezultadu empata ne’e hahú ho jogu impressivu no brillante dala ida tán husi atleta Helder de Araújo ne’ebé halakon ninia adversáriu Abdulaziz Alzamil.

Lee Mós: Olimpiade Xadrés Mundiál, Ekipa Mane TL Manan Fiji

Atleta Helder ne’ebé tuir loloos ho pozisaun lakon ona, maibé dala ida tán hatudu ninia kualidade análiza ho ‘Genius’ hodi halakon fali ninia oponente.

“Ho manán ida ne’e Atleta Helder gaña ona pontu 7 husi joga dala 7 nian iha Eventu Mundiál ida ne’e,” Hatutan.com sita komunikadu.

Atleta mane seniór seluk, CM Tito dos Reis hatudu mós nia matenek hasoru oponente ho Naran Ahmed Al Thebaiti.

Atleta Tito dos Reis fera-kakutak durante oras haat ho balun nia laran atu halo nia oponente foti liman. Ho manán ida ne’e, atleta ho títulu Candidate Master desde tinan 2018 ne’e gaña ona totál  pontu 3.5 husi manán dala tolu no empata dala ida.

Iha sorin seluk, Atleta Marcos da Conceição ne’ebé iha jogu anteriór halakon ninia oponente ho check mate furak-tebes, iha Ronda Da-siak la konsege kontribui pontu.

Hanesan mós ho Atleta Cosme Guterres ne’ebé durante joga iha oras rua nia laran la konsege vense mós ninia oponente.

Ho rezultadu iha Ronda Da-siak nian ne’e, ekipa mane gaña ona totál pontu 14.5. Totál naktemin kontribui husi Atleta Helder de Araújo pontu 7, Tito dos Reis pontu 3.5, Cosme Guterres pontu 2 no Marcos da Conceição pontu 2.

Iha jogu Parte Feto nian, atleta sira esforsu ona ho másima maibé pozisaun ikus husi oponente sira di’ak liu no ladauk kontribui hikas pontu iha Ronda Da-siak ne’e.

Ba Jogu Penúltima ne’ebé sei realiza iha loron Segunda, 08 Agostu, Komisaun Organizadora seidauk hatúr Pairing ba nasaun no mós atleta.

Jornalista: Vito Salvadór