Joven Na’in-rua Hatama Sigaru Ilegál Hosi Atambua

Hatutan.com, (08 Agostu 2022), Díli—Komandu Polísia Nasionál Timor-Leste (PNTL) Munisipiu Bobonaro, liu hosi Komandante Operasaun Munisipál, lidera ekipa na’in-haat halo vizilánsia no konsege kaptura joven mane na’in-rua hatama sigaru ilegál hosi Atambua liu hosi área Lontas, Postu-Administrativu Lolotoe.

PNTL Bobonaro detein joven na’in-rua ne’ebé halo transaksaun illegal ba sigaru illegal iha fronteira, Sábadu (06/08/2022). Foto/PNTL.

Vizilánsia no identifikasaun transaksaun ilegál ba sigaru marka Surya kaixa rua iha Suku Oeleu, Postu-Administrativu Bobobanro no konsege kaptura timoroan na’in-rua ho inisial AC tinan 41 hosi Postu Atabae no ida seluk naran inisiál APC tinan 28 hosi Lebos, Postu Lolotoe nian, maibé hela iha Bairru-Pité Díli, tanba lori tama sasan hosi Atambua liu hosi dalan illegal.

Lee Mós: Transaksaun Ilegál Kontinua Buras Iha Fronteira Tanba Menus Rekursu Umanu

“Ekipa operasaun asegura mós motorizada rua ho marka Mio J kór mutin no Mio Beat kór mean ne’ebé mak sira uza hodi halo atividade ilegál ne’e,” Hatutan.com sita deklarasaun Komandante PNTL Munisípiu Bobonaro, Superintendente Polísia Antoninho Mauluta, iha komunikadu Sábadu foin lalais ne’e.

Hafoin halo kapturasaun, ekipa operasaun halo kedan nota auto partisipasaun no entrega suspeitu ho evidénsia hirak ne’e ba Servisu Investigasaun Kriminál hodi submete ba investigasaun.

Jornalista: Rogério Pereira Carceres