Alkatiri: Problema Hotu Kona-bá Ró Haksolok Rezolvidu

Hatutan.com, (09 Agostu 2022), Díli- Antigu Prezidente Autoridade Rejiaun Administrativa Espesiál Oé-Cusse Ambeno (RAEO) no Zona Ekonomia Espesiál Sosiál Merkadu (ZEESM), Mari Bin Amude Alkatiri, informa katak problema hotu kona-bá ró Haksolok nian rezolvidu ona.

Lee Mós : CAC Seidauk Hetan Delegasaun Investiga Kazu Ró Haksolok

Prezidente Autoridade RAEOA Mari Alkatiri, tempu ne’ebá akompaña hosi Bispu Eméritu Dom Carlos Filipe Ximenes Belo, SDB ho Madre Guilhermina Marçal FdCC, hala’o lansamentu ba ró Haksolok iha Portugál, Sesta (26/05/2017). Foto/Dok. ISQ.

Alkatiri hateten ró Haksolok nu’udár primeiru investimentu Timor-Leste nian iha Eropa no 95% empreza Timor mak investe iha estaleiru (fatin harii ró) Atlantic Eagle Ship Building, Lda.

Nia afirma, oras ne’e falta de’it kondisaun atu halo ró Haksolok ne’e to’o kompletu hodi haruka mai Timor-Leste. “Kondisaun mak fiskalizasaun tenke iha atu ró Haksolok ne’e atu hahú, tanba problema hotu-hotu rezolvidu ona, no ida-ne’e nu’udár investimentu primeiru Timor nian iha Eropa no rai li’ur,” Mari Bin Amude Alkatiri hateten hodi responde jornalista sira hafoin hasoru malu ho Prezidente Repúblika (PR), José Ramos-Horta iha Palásiu Prezidensiál, Díli, Tersa (09/08/2022).

Mari Alkatiri lakohi kompleta tan ho komentariu naruk, maibé prontu atu hatán bá se de’it no hein to’o kampañia mak balun ko’alia nia prontu hatán.

Ró Haksolok daudaun ne’e iha sidade Figueirra da Voz, Portugál tanba uluk iha problema kapasidade finanseira kompañia Atlantic Eagle Ship Building, Lda.

Ró Haksolok ne’e ho kustu millaun Euro 13,7 inaugura iha loron 26 fulan-Maiu 2017 no promete ró ne’e tenke to’o ona iha Timor-Leste iha fulan-Outubru 2017.

Lee Mós : Arsénio Promete tán Sei Finaliza Konstrusaun Ró Haksolok Uza Millaun $14  

Jornalista: Vito Salvadór