Defeza & Seguransa
Karreta Célula Prizaun Suai Presiza Manutensaun
Hatutan.com, (09 Agostu 2022), Díli—Estabelesimentu prizaun Suai daudaun ne’e enfrenta difikuldade kona-bá karreta Celula ne’ebé utiliza hodi tula dadur sira ba tuir julgamentu no halo tratamentu saúde, maski antes ne’e Ministru Justisa (MJ) promete ona atu solusiona problema ne’e maibé to’o agora seidauk rezolve.
Komandu PNTL Munisípiu Covalima evakua prizioneiru na’in 218 hosi prizaun Suai ba aredór Aeroporto Suai, hafoin hetan estragu makas hosi inundasaun durante loron tomak, iha 01 jullu 2022. Foto/PNTL.
“Difikuldade kona-bá transporte hosi inísiu karreta rua, ida karreta célula no pick up ida. Maibé kondisaun karreta mak presiza halo manutensaun,”diretór prizaun Suai, Júlio Dias Ximenes hateten via telefónika, Tersa (09/08/2022).
Lee Mós: Ministru Justisa Observa Direta Kondisaun Estabelesimentu Prizionál Suai
Antes ne’e Ministru Justisa, Tiago Amaral Sarmento promete sei tau-atensaun hodi rezolve lalais problema karreta ne’ebé prizaun sira hasoru.
Tuir dadus hosi estabelesimentu prizaun Suai, daudaun ne’e akumula dadur na’in 117 kompostu hosi prizaun kondenadu 85, prizaun preventiva 32 ho guarda prizionál na’in 37.
Estabelesimentu prizaun Suai akumula de’it dadur sira ne’ebé mai hosi Munisipiu haat hanesan Covalima na’in 38, Ainaro na’in 28, Bobonaro na’in 40 no Manufahi na’in 11.
Maioria kondenadu sira ne’e mai ho krime ne’ebé a’as liu maka violasaun seksuál no omesídiu.
Jornalista: Carmelita Isaac