Taur Kontente ho Notísia Di’ak hosi ASEAN Kona-bá Dispozisaun Simu TL iha 2023

Hatutan.com, (09 Agostu 2022), Díli–Primeiru-Ministru (PM), Taur Matan Ruak, kontente ho notísia di’ak hosi Asosiasaun País sira Sudeste Aziátiku nian (ASEAN, sigla Ingles) kona-bá dispozisaun atu simu Timor-Leste hanesan membru foun iha tinan 2023.

Lee Mós : Kambodia Garante Adezaun TL Bá ASEAN iha 2023

Primeiru Ministru (PM), Taur Matan Ruak. Foto/Hatutan.com

“Ha’u rona notísia di’ak loos, katak ita iha kondisaun para tama iha tinan oin, Ministru Singapura foin daudaun mai hasoru ha’u, ha’u mak husu bá nia. Ita-boot nia rai mak lakohi ami atu tama, nia dehan lae, ami ajuda imi. Ha’u espera sira hotu konsensu, porque ne’e konsensu sira hotu bele ajuda Timor-Leste tama, mas Timor-Leste la husu favór. Ha’u hanesan Primeiru-Ministru kuandu delegasaun mai, ha’u husu, imi hakarak ami tama ka lae? Se imi hakarak prepara buat ruma mai ami, se imi lakohi hateten, ami bele prepara 20 anos da aqui mós di’ak. Mas ha’u kontente loos finalmente simu notísia di’ak katak tinan oin posibilidade Timor-Leste bele tama, ha’u espera tinan oin,” Xefe Governu haktuir iha konta Facebook ofisial Primeiro-Ministro: S.E. Taur Matan Ruak ne’ebé  Hatutan.com sita.

Iha reuniaun bá da-55 Ministru sira Negósiu Estranjeiru ASEAN nian iha loron 5 fulan-Agostu 2022 iha Phnom Penh, Kamboja, hasai komunikadu ida kona-bá dispozisaun ASEAN nian bá prosesu adezaun Timor-Leste nian iha organizasaun refere iha tinan 2023, tanba ASEAN satisfeitu ho rezultadu ekipa hosi misaun Fact Finding Mission hosi pillar sósiu kulturál no pillar ekonómiku iha tinan 2022 ne’e.

Iha komunikadu ne’e, ASEAN mós hato’o sira-nia re-afirmasaun kontinua presta asisténsia kapasitasaun bá Timor-Leste inklui liuhosi partisipasaun sira iha atividade sira la’ós polítika iha ASEAN nian.

Xefe Governu Timorense mós husu bá ASEAN atu labele avalia Timor-Leste ho baze programa País sira ne’ebé ukun an tinan 40-50 bá leten, tanba imposivel Timor-Leste ne’ebé foin ukun an tinan 20 atu hanesan ho País sira ukun an tinan 40 ka 50. Timor-Leste nu’udár nasaun sei kontinua dezenvolve iha aspetu hotu-hotu.

Jornalista : Rogério Cárceres