Timoroan Na’in-tolu Hetan Títulu Direta Hosi FIDE Iha Olimpiade Xadrez Mundiál

Hatutan.com, (09 Agostu 2022), Díli—Atleta  Timoroan na’in-tolu hetan títulu FIDE iha Olimpiade Xadrez Mundiál 2022, ne’ebé hala’o iha Chennai-Índia.

Atleta Timoroan ne’ebé Partisipa iha Olimpiade Xadrez Mundiál 2022, ne’ebé hala’o iha Chennai-Índia. Foto/Federasaun Xadres.

Atleta Timoroan na’in-tolu ne’ebé mak hetan títulu direta hosi International Chess Federation (FIDE) iha Olimpiade Xadrez Mundiál 2022 mak hanesan Helder de Araújo hetan títulu direta nu’udár FIDE Master (FM) ho pontu 7.5.

Lee Mós: Atleta TL Kontinua Rekolla Pontu Pozitivu iha Ronde X Olimpiade Xadrez Mundiál

Sonizia Tilman da Silva hetan títulu nu’udár Women Candidate Master (WCM) ho pontu 5 no Elfiana dos Santos hetan mós títulu Women Candidate Master (WCM) ho pontu 4.

“Ho títulu foun tolu mensionadu, Timor-Leste iha ona atleta ho títulu CM na’in-ida mak Tito dos Reis, WCM na’in-rua  maka Sonizia Tilman da Silva no Elfiana dos Santos no FM na’in-ida  maka Helder Soares de Araújo,” Hatutan.com sita komunikadu.

Iha jogu ikus ba ekipa mane no feto Timor-Leste iha Olimpiade Xadrez Mundiál, atleta Elfiana dos Santos manán nia oponente maski atleta sira seluk la konsege kontribui vitória.

Iha Jogu Ronda ikus nian ne’e, atleta Elfiana dos Santos hamate liurai hosi oponente ho naran Chika Pride hosi nasaun Bahamas durante oras tolu nia laran. Ho manán iha ronda ikus nian ne’e, atleta Elfiana dos Santos gaña totál pontu individual 4.

Jornalista: Vito Salvadór