Ekonomia
Ministru Finansas Enkoraza g7+ Kontinua Promove TL Iha Nível Globál
Hatutan.com, (10 Agostu 2022), Díli—Ministru Finansas Rui Gomes simu vizita kortezia hosi ekipa Sekretariadu g7+ ne’ebé lidera hosi Sekretáriu Jerál g7+, Helder da Costa hodi atualiza kona-bá g7+ nia progresu servisu no susesu sira ne’ebé mak organizasaun intergovernamentál ne’e alkansa ona iha área konstrusaun pás no konstrusaun Estadu iha nível mundiál.
Ministru Finansas Rui Gomes simu vizita kortezia hosi ekipa Sekretariadu g7+ ne’ebé lidera hosi Sekretáriu Jerál g7+, Helder da Costa hodi atualiza kona-bá g7+ nia progresu servisu no susesu sira ne’ebé mak organizasaun intergovernamentál ne’e alkansa ona iha área konstrusaun pás no konstrusaun Estadu iha nível mundiál. Foto/MF.
Konsidera g7+ reprezenta Timor-Leste iha nível internasionál, Ministru Rui Gomes mós fahe informasaun importante balun kona-bá Reforma oioin ne’ebé mak daudaun ne’e Ministériu halo hela.
Lee Mós:Governu Atribui Millaun $1 ba g7+ Atu Finansia Despeza Globál-Nasionál
Informasaun sira ne’e mak hanesan reforma Fiskál no Jestaun Finansas Públikas; Implementasaun Orsamentu pur Programa ho forma ida ne’ebé kompletu desde tinan 2021; Promulgasaun Lei Enkuadramentu Orsamentál no Rejime Jurídiku Aprovizionamentu husi Prezidente Repúblika Lu-Olo; nomós Promulgasaun Lei das Grandes Opções do Plano 2023 husi Prezidente Repúblika José Ramos-Horta iha fulan-juñu liubá.
Governante ne’e mós enkoraja Sekretariadu g7+ atu kontinua promove Timor-Leste iha nível globál nu’udár Estadu pasífiku ida ne’ebé nakloke ba investimentu estranjeirus no hamutuk no Parseirus Dezenvolvimentu, Timor-Leste komprometidu atu rekupera filafali ninia ekonomia hodi harii sosiedade ida ne’ebé mais reziliente.
“Aproveita oportunidade ne’e, Sekretáriu Jerál g7+ mós estende konvite ba Ministériu Finansas atu nomeia reprezentante ida hosi Ministériu hamutuk ho ekipa g7+ atu partisipa iha 145𝑡ℎ 𝑆𝑒𝑠𝑠𝑖𝑜𝑛 𝑜𝑓 𝑡ℎ𝑒 𝐼𝑛𝑡𝑒𝑟-𝑃𝑎𝑟𝑙𝑖𝑎𝑚𝑒𝑛𝑡𝑎𝑟𝑦 𝑈𝑛𝑖𝑜𝑛 ne’ebé sei realiza iha fulan-outubru iha Rwanda,” Hatutan.com sita komunikadu.
Akompaña Ministru Finansas, Rui Gomes iha reuniaun ne’e, Xefe Gabinete Ministru Finansas, David Guterres, Diretór Jerál Planeamentu no Orsamentu, Jose Alexandre de Carvalho, Koordenadór Gabinete Apoiu Jurídiku, Isac Menezes nomós Diretór Jerál Jestaun no Mobilizasaun Rekursus Esterna, Francisco da Silva no nia ekipa.
Jornalista: Rogério Pereira Cárceres