Defeza & Seguransa
Sai Hosi Prizaun, Joven FdF Na’ok Tán Motór 14 Iha Díli Laran
Hatutan.com, (10 Agostu 2022), Díli—Ekipa konjunta servisu sekreta hosi Servisu Informasaun Polísia (SIP) Nasionál, Polísia Nasionál Timor-Leste (PNTL), Servisu Informasaun Militár (SIM) FALINTIL Forsa Defeza Timor-Leste (F-FDTL), junta ho Servisu Nasionál Intelijénsia(SNI), kaptura joven na’in-ida ho inisiál FdF alias TK tinan 24, hosi Suku Caibada, Postu Administrativu Baucau, Munisípiu Baucau no hela iha Suku Becora, ne’ebé durante ne’e na’ok motór iha kapitál Dili hamutuk 14.
Joven na’in-ida ho inisiál FdF alias TK tinan 24, hosi Suku Caibada, Postu Administrativu Baucau, Munisípiu Baucau no hela iha Suku Becora, ne’ebé durante ne’e na’ok motór iha kapitál Dili hamutuk 14. Foto/PNTL.
Ekipa konjunta kaptura suspeitu FdF, iha nia rezidénsia besik Prizaun Becora tuku 02:12 dadeer hamutuk ho evidénsia motór ida, hafoin simu informasaun hosi fontes destakadu no lori kedan mai edifísiu SIPN iha Caicoli.
Lee Mós:SIP Detein Joven Na’in-lima Ne’ebé Involve iha Kazu Na’ok Motór
“Iha prosesu identifikasaun, suspeitu FdF deklara nia na’ok ona motorizada 14, labtop tolu, bisikleta, mákina tesi dut, telefone iha fatin ne’ebé la hanesan no sasán hirak-ne’e balun fa’an ona no balun asegura hela iha suspeitu ES nia uma iha área Tasi-tolu no Munisípiu seluk tán,” Hatutan.com sita deklarasaun suspeitu iha komunikadu.
Suspeitu FdF mós foin sai hosi prizaun iha loron 27 fulan Maiu tinan 2022, hafoin kumpri pena prizaun durante tinan haat iha prizaun Becora tanba komete kazu hanesan.
Hosi deklarasaun hirak-ne’e, ekipa konjunta tula suspeitu FdF hodi hatudu fatin akontesimentu no evidénsia hirak ne’ebé nia fa’an inklui ema sira ne’ebé sosa no rekolla hikas motorizada hitu, laptop rua no telefone ida iha área Tasi-tolu restante seidauk hetan tanba fa’an ona ba ema seluk.
Agora daudaun Xefe SIP Nasionál orienta ona ekipa konjunta dezenvolve kazu no fahe ekipa halo vizilánsia totál menus hosi oras 24 nia laran hodi rekolla tán evidénsia seluk hanesan motór, labtop inklui sindikatu sira ne’ebé envolve iha kazu refere.
Jornalista: Rogério Pereira Cárceres