SRT Sei Komemora Loron FALINTIL no Konsulta Popular ho Drag Bike

Hatutan.com, (10 Agostu 2022), Díli- Komisaun organizadora Speed Racing Team (SRT) sei realiza  Eventu Drag Bike hodi komemora loron FALINTIL (20 Agostu 2022) no loron konsulta popular (30 Agostu 2022) ho atividade Drag iha Kristu Rei, Díli.

Komisaun organizadora Speed Racing Team (SRT). Foto/Hatutan.com

Portavós komisaun organizadora, David Porfírio do Rosário da Silva, bá jornalista sira hafoin hasoru malu ho Prezidente Repúblika (PR), José Ramos-Horta iha Palásiu Prezidensiál, Kuarta (10/08/2022), hateten atu komemora loron FALINTIL bá da-47 no loron Konsulta Popular bá da-23 maka komunidade Drag Bike Timor-Leste hamutuk ho Federasaun Motor Siklizmu Timor-Leste (FMCTL), hasoru Xefe Estadu hodi informa atividade ne’ebé sei realiza iha loron 03-04 fulan-Setembru iha Kristu Rei.

Liuhosi sorumutuk ne’e ekipa komisaun organizadora mós husu atu Xefe Estadu bele tulun atividade ne’e ho apoiu finanseiru ruma.

Komisaun organizadora mós hanoin katak ho eventu motor bike bele halibur hikas joven sira hotu atu iha unidade hodi haluha tiha konflitu no buat sira ne’ebé hafahe joven sira.

Iha eventu Motor Bike tinan ida ne’e sei partisipa mós Joki internasional husi nasaun viziñu Indonézia liu-liu Joki sira husi Timor Osidentál atu bele habelun di’ak liután amizade entre nasaun rua liu-liu ba foinsa’e sira.

Prezidente Repúblika José Ramos-Horta apresia no apoiu tebes  inisiativa husi komisaun organizadora ne’e ho vontade hakarak kria eventu Drag Motor Bike tanba eventu ida-ne’e sei halibur joven sira ne’ebé iha talentu ba motor no kontribui ba kris pás iha foin-sa’e sira.

Jornalista: Vito Salvadór