Hatutan.com, (11 Agostu 2022), Díli—Hahú fulan Janeiru to’o Juñu, Comissão Anti Corrupção (CAC) hetan delegasaun kompeténsia hosi Ministériu Públiku (MP) hodi halo investigasaun ba kazu hamutuk 76.
“Iha fulan Janeiru mai to’o agora CAC halo investigasaun ba kazu ne’ebé delega mai hosi MP hamutuk 76. Hosi númeru ne’e kazu 37 mak remesa ona nia relatóriu finál ba MP no iha kazu 39 mak sei iha prosesu investigasaun,” Diretór Investigasaun CAC, José Verdiál hateten ba Hatutan.com via WhatsAap, Kinta (11/08/2022).
Lee Mós: Kazu Abuzu Podér Iha RAEOA, CAC Remese Relatóriu Investigasaun ba MP
Hosi kazu refere, hirak ne’ebé konsege remese ona relatóriu finál ba MP mak hanesan kazu projetu Instalasaun Set-top Box RTTL,E.P, Kazu Abuzu Podér iha RAEOA no sira seluk tán.
Hosi kazu ne’ebé CAC halo investigasaun maioria ho alegasaun ba krime administrasaun danoza, pekulatu de uzu, pekulatu, falsifilasaun dokumentus, fraúde fiskál, korrupsaun ativa no passiva ba aktu ílisitu.
Tuir prosesu ne’ebé iha katak, bainhira CAC remese relatóriu investigasaun ba MP maka MP sei halo analiza no bainhira sei iha falta ruma mak sei haruka fali despaixu própriu ho orientasaun klara ba CAC hodi halo re-abertura hodi fó sekuénsia ba órden MP nian.
Jornalista: Carmelita Isaac
