Defeza & Seguransa
SIP Rekolla Hela Dadus Motór-Karreta Importadu Ne’ebé Sirkula Iha TL
Hatutan.com, (11 Agostu 2022), Díli— Polisia Nasionál Timor-Leste (PNTL), liuhosi unidade Servisu Informasaun Polísia (SIP), daudaun ne’e halo hela identifikasaun hodi rekolla dadus bá motór no karreta importadu sira ne’ebé sirkula hela iha territóriu Timor-Leste (TL).
Objetivu hosi rekollamentu dadus ba transporte sira ne’e, hodi sai hanesan baze dadus ba ekipa sira SIP nian, nune’e bainhira iha sasán ruma lakon, bele hafásil liu tán ekipa sira ninia servisu.
Lee Mós:
Komandante Jerál PNTL, Komisáriu Polísia Faustino da Costa dehan, ekipa SIP ninia servisu kontrolu, haree liu kona-bá situasaun rua, ida mak autór kríminozu sira no ida seluk maka buka-tuir kona-bá prova ka evidénsia sira ne’ebé mak lakon, tanba na’ok hosi grupu sira ne’ebé organizadu no ilegál. Ezemplu, grupu na’ok teen rona malu (Nakroma).
“Ita halo hela faze identifikasaun oinsá atu kompleta, Katak iha futuru bele iha baze de dadus ida ne’ebé hatene loloos TL ne’e iha motór totál hira, motór saida-saida, iha karreta saida-saida, importasaun foun mak ida ne’ebé, mai hosi ne’ebé,” Komisáriu Polisia Faustino da Costa hateten hafoin serimónia inaugurasaun sentru integradu jestaun informasaun ba investigasaun kriminál no edifísiu informátika Teknolojia nian, iha Kuartél Jerál PNTL, Caicoli, Kinta (11/08/2022).
Iha Servisu Informasaun Polisia, la’ós PNTL mesak maibé durante ne’e envolve mós hosi Servisu Nasionál Intelijénsia (SNI), Servisu Informasaun Militár (SIM ka J2).
Servisu ne’ebé durante ne’e ekipa sira hala’o, la’ós de’it konsentra iha kapitál Díli, maibé perkore mós iha munisipiu hotu no ekipa sira ninia servisu durante ne’e la’o di’ak hela.
Komisáriu Faustino da Costa kongratula mós ekipa sira ninia servisu durante ne’e, tanba iha semana hirak ikus ne’e, konsege kaptura autór lubun ida ne’ebé mak envolve iha krime organizadu, hodi na’ok ema ninia motór ho sasán eletrónika sira iha Dili laran to’o iha munisipiu sira.
Jornalista: Rogério Pereira Cárceres