Hatutan.com, (12 Agostu 2022), Díli—Prezidente Repúblika (PR), José Ramos-Horta iha preokupasaun boot no iha esforsu makas oinsá lori líder nasionál sira hodi ko’alia ba malu, atu hadi’a ekonomia rai laran no hamutuk hanoin ba dezenvolvimentu país ne’e nian.
Ramos-Horta optimista katak, esforsu ne’e bele realiza iha Setembru tinan ida-ne’e tanba hasoru-malu ona ho Eis Primeiru Ministru Marí Bim Amude Alkatiri, hasoru malu mós ho Primeiru Ministru (PM) Taur Matan Ruak iha kada semana.
Lee Mós: Taur Kontente ho Rekonsiliasaun, Alkatiri mós Lakohi Diskrimina Timoroan iha Timor Osidentál
Hasoru malu ne’e ho objetivu hodi diskute programa no progresu sira servisu governu nian no iha mós kontaktu ho Eis Prezidente Repúblika Kay Rala Xanana Gusmão, nune’e iha tempu, loloos liu tiha kongressu FRETILIN iha fulan Setembru, independentemente rezultadu kongressu iha ona, haree took bele buka halo diálogu hodi haree ba oin, dezafiu ne’ebé Timor Leste enfrenta liu-liu iha 2023 ba to’o 2028.
“Ida-ne’e diálogu normál ida. Ha’u nia preokupasaun boot liu maka líder sira tenke ko’alia ba malu, Timor Leste la’ós hanesan nasaun sira seluk no laiha konflitu. Nune’e, tinan lima mai simbolikamente jerasaun 1975 hamutuk ho líder nasionál sira seluk tenke halo diálogu atu haree konsensu nasionál hodi rezolve dezafiu boot iha rai ida ne’e nian, liu-liu iha sistema polítika partidaria, demokrasia, Estadu direitu no ekonómia,” Ramos-Horta hateten iha edifísiu Kuartél Jerál PNTL Kaikoli, Sesta (12/08/2022).
Premiadu Nobel ba Pás ne’e konsidera, Timor Leste nia polítika la’o di’ak no mundialmente okupa klasifikasaun di’ak, maibé avaliasaun ba TL nia ekonomia dala ruma bele hetan negativu karik.
Entaun, hanoin katak Timor Leste labele de’it demokrasia di’ak maibé ekonomikamente mós tenke di’ak.
Iha tinan sira mai ne’e, TL besik tama ba ASEAN nune’e presiza servisu maka’as no lider sira hotu tenke hamutuk tanba ASEAN fó oportunidade boot ba Timor nia ekonomia atu haksoit ba oin.
Timor Leste tenke aselera parke industriál ne’ebé governu rasik aprova tiha ona iha fulan hirak liu ba no hetan ona promulgasaun hosi Xefe Estadu ne’ebé bele avansa ho ida-ne’e hodi muda ekonomia Timor Leste nian.
Jornalista: Vito Salvadór
