Vise-Ministru Interiór, António Armindo esplika orsamentu millaun $43 ba PNTL ne’e barak liu sei aloka ba preparasaun seguransa iha kampaña no eleisaun Parlamentár tinan oin, tanba 2023 hanesan tinan ida ne’ebé mak badak tebes ba Oitavu Governu Konstitusionál.
Advertisement
Orsamentu ba PNTL nian ne’e sa’e, tanba Governu iha previzaun ba rejíme salariál ne’ebé mak fó ba instituisaun PNTL, aumenta ba pursentu 15 (15%). Ho mudansa sira hanesan ne’e maka, orsamentu ba PNTL mós aumenta.
“Sira nia saláriu vensimentu de’it, sa’e ona ba millaun %31 ba tinan ne’e. Tinan oin, tuir mai nune’e hela de’it. Entaun, iha ne’e orsamentu ida ne’ebé mak boot loos. Maibé, tanba governu nia politika tenke mellora sira nia bem estár ka moris di’ak, entaun tenke hahú revizaun ki’ik ida hanesan ne’e atu sira bele sente ho sira nia servisu,” António Armindo hateten hafoin aprezenta porposta OJE MI nian ba PM Taur Matan Ruak, iha rezidénsia Faról, Tersa (16/08/2022).
Manutensaun ba Roo UPM
Hatán kona-bá orsamentu millaun $43 ba PNTL ne’e, karik sei aloka mós ba iha prosesu manutensaun ba Roo Unidade Polisia Marítima (UPM) nian, António Armindo dehan, kada tinan governu liuhosi MI sempre prevee orsamentu ba manutensaun roo.
Maibé, ligadu ba situasaun funu entre nasaun Ukraina ho Rúsia, inkui ho pandemia globál Covid-19, afeta ba folin sasán ne’ebé aumenta ba bebeik.
Advertisement
Entaun, orsamentu ne’ebé prevee ne’e, la to’o tiha fali, maibé agora daudaun komandu buka dalan, atu haree kompañia sira ne’ebé bele halo manutensaun.
Maske nune’e, governu sei kontinua buka nafatin dalan, atu orsamenta took sira ne’ebé la uza, bele muda fali ba halo manutensaun ba iha ró sira ne’e.
Enkuantu, orsamentu millaun $10 ba MI, inklui Servisu Migrasaun (SM) ne’e kuaze rihun $400 mak sei aloka programa tráfiku umanu nian.
Programa tráfiku umanu ne’e, parte governu sei koopera ho parseiru sira ne’ebé mak durante ne’e halo ona parseria ho Governu, liu-liu Organizasaun Internasionál ba Migrasaun (IOM-Sigla Inglés), atu kontinua programa formasaun tráfiku umanu ba membru PNTL sira.
Advertisement
Tuir relatóriu Nasaun Unidas nian katak, TL ho kazu tráfiku umanu ida ne’ebé tama ona iha nivel segundu. Tanba ne’e, hahú agora ba oin, Governu tenke servisu maka’as, atu labele avansa ba nivel ida terseiru.