Hatutan.com, (17 Agostu 2022), Díli—Governu la tolera sidadaun sira ne’ebé mak ho intensaun aat, hakarak halo trasaksaun ba ai-moruk droga hodi espalla iha Timor-Leste (TL).
Ministru Prezidénsia no Konsellu Ministru (MPKM), Fidelis Manuel Leite Magalhães hateten, Timor-Leste iha polisia espesializadu sira hanesan Polisia Nasionál Timor-Leste (PNTL), Policia Ciêntífica e de Investigação Criminal (PCIC), Comissão Anti Corrupção (CAC), ne’ebé mak iha matéria sira relasiona ho korrupsaun no kada instituisaun ne’e, hala’o ninia servisu rasik.
Lee Mós:Tribunál Aplika TIR bá Arguidu Kazu Ilísitu Droga Hamosu Kritika iha Mundu Virtuál
“Governu tenke halo esforsu hotu, kapasita PNTL, kapasita PSIK atu iha seriedade no ita labele tolera Drogas atu bele espalla iha ita nia rain. Liu-liu hanesan hatama droga mai Timor, fahe droga ba mai, fa’an droga, ne’e hanesan ameasa perigu tebes ba ita nia sosiedade, liu-liu barak liu maka foinsa’e sira,” Fidelis Manuel Leite Magalhães hateten hafoin surumutu Konsellu Ministru ordináriu, iha Palásiu Governu, Díli, Kuarta (17/09/2022).
Governu mós respeita desizaun Tribunál nian ne’ebé aplika medida koasaun Termu Identidade Rezidénsia (TIR) ba arguidu na’in-sia ne’ebé halo transaksaun no konsumu ai-moruk droga, tanba TL hanesan nasaun demokrátiku, nune’e kada órgaun hala’o nia servisu.
“Sé ezekutivu mak halo komenta hotu kona-bá desizaun sira Tribunál nian, entaun ita la respeita fali Estadu de direitu demokrátiku, ita ladun respeita fali funsionamentu sira Tribunál nian,” Fidelis afirma.
Bainhira sidadaun ka ema ruma mak konkorda ka la konkorda ho desizaun sira Tribunál nian, ida-ne’e tanba TL iha ninia sistema justisa rasik, hanesan iha Tribunál, juíz sira, Ministériu Públiku ne’ebé mak halo ninia akuzasaun sira.
Iha mós Defensória Públika sira ne’ebé mak halo defeza ba ema sira ne’ebé mak sai arguidu, no polisia sira hala’o sira nia servisu investigasaun.
Jornalista: Rogério Pereira Cárceres
