Mari Alkatiri: Instituisaun Estadu La’ós Ema Ida Nia Uma

Hatutan.com, (23 Agostu 2022) Díli—Sekretáriu Jerál Partidu FRETILIN, Mari Alkatiri, hateten  Estadu  direitu hanesan eskola ida ne’ebé presiza iha avaliasaun no bainhira valor di’ak bele pasa no hirak ne’ebé valor la di’ak labele pasa, tanba ne’e bainhira asume knar iha instituisaun Estadu no ministériu hanesan funsaun ida hodi kumpre programa Governu la’ós utiliza hanesan uma.

Sekretariu Jerál Partidu FRETILIN, Mari Alkatiri, sai oradór prinsipál bá semináriu ho sub tema valores demokrasia iha prosesu dezenvolvimentu nasionál ne’ebé organiza hosi Universidade Dili (UNDIL), Tersa (23/08/2022). Foto/Hatutan.com

“Governu hanesan eskola ne’ebé tenke iha avaliasaun, nune’e bainhira pasa bele pasa, maibé bainhira labele pasa tenke simu tanba ne’e instituisaun Estadu ka Ministériu ne’ebé iha la’ós imi nia uma, maibé hanesan funsaun hodi kumpre programa Governu, tanba ema barak iha hanoin katak ministériu ne’ebé nia asume nia maka bele komanda no manda ho nune’e tenke tau fali iha nia fatin, tanba balun mai kesar, maibé ha’u la’ós Primeiru Ministru no ha’u lakohi tuur iha kotuk, maka komanda ne’e ha’u lakohi,” Mari Alkatiri hateten bainhira sai oradór prinsipál bá semináriu ho sub tema valores demokrasia iha prosesu dezenvolvimentu nasionál ne’ebé organiza hosi Universidade Dili (UNDIL), Tersa (23/08/2022).

Mari Alkatiri afirma, tenke fó fila vida institusionál no kulturalmente Estadu nian, tanba Estadu iha rasik nia kultura no vida própriu, maibé tenke iha kooperasaun, solidariedade no naturalmente idak-idak ho nia kompeténsia.

Alkatiri mós dehan, nia prontu atu fó nia kabas bá jerasaun foun sira hodi husu nafatin vida ne’ebé naruk nune’e bele hamutuk fó fila vida Konstitusionál bá rai ida ne’e.

Jornalista: Carmelita Isaac