EUA ho TL Inaugura Fasilidade Izolamentu Foun iha Baucau

Hatutan.com, (24 Agostu 2022), Dili–Enkarregadu Negósiu Embaixada Estadus Unidus Amérika (EUA) iha Timor-Leste, Tom Daley, diretora Misaun USAID, Zema Semunegus, ho Ministra Saúde Odete Belo, Sesta (19/08/2022), halo inaugurasaun bá fasilidade izolamentu foun ida iha Ospitál Referral Baucau.

Lee Mós : TL ho EUA Ofisializa Akordu Implementasaun Prinsípiu Resiprosidade

Inaugurasaun sala izolamentu foun iha Ospitál Referal Baucau. Foto/EUA

Projetu ne’e dezenvolve ho apoiu hosi Estadus Unidus liuhosi Ajénsia Estadus Unidus bá Dezenvolvimentu Internasionál (USAID) no Komandu Indo-Pasífiku Estadus Unidus nian.

“Ha ‘u hakarak agradese Ministra Saúde bá ninia kooperasaun di’ak iha konstrusaun projetu ida-ne’e nian,”  Enkarregadu Negósiu Embaixada EUA, Tom Daley hateten liuhosi komunikadu imprensa.

“Ema sira ne’ebé hela iha Munisípiu Baucau bele haksolok tanba sente katak fasilidade ne’e ajuda kombate COVID-19 no hametin seguransa saúde iha tempu naruk. Projetu ne’e nu’udar ezemplu importante ida kona-bá oinsá ita-nia parseria bele hakat bá oin hodi luta hasoru COVID-19 no hadi’a timoroan nia moris,” Tom Daley.

Fasilidade izolamentu ne’e nia papél esensiál hodi prevene COVID-19 iha rejiaun ida ne’e, ne’ebé kompostu hosi ema besik 300.000, hodi reforsa operasaun ospitál nian sira no hamenus tranzmisaun virus.

Fatin izolamentu ho medida 142 metru kuadradu ne’e, inklui fatin bá enfermeiru ida, área ida ho kama neen, no sala ida ho kama rua bá presaun negativu.

Sala presaun negativu ne’e prevene kontaminasaun entre sala sira no asegura pesoál saúde sira atu halo tratamentu seguru bá pasiente sira ne’ebé presiza liu atensaun.

Dezde pandemia ne’e hahú, Estadus Unidus serbisu hamutuk ho Governu Timor-Leste hodi fornese vasina Pfizer doze liu 200,000 no millaun $7.4 iha asisténsia krítiku hodi kombate COVID-19.

Estadus Unidus hala’o hela abordajen abranjente ida hodi hapara pandemia ne’e iha mundu tomak, hodi hamenus impaktu hosi COVID-19 bá ema no sosiedade no hametin rekuperasaun globál.

Iha tinan 20 ikus ne’e, Estadus Unidus liuhusi USAID fornese ona liu millaun $320 inklui liu millaun $20 iha setór saúde bá Timor-Leste hodi hametin governasaun no haluan prosperidade.

Jornalista : Carmelita Isaac