Servidór HNGV Halo Reflesaun

Hatutan.com, (26 Agostu 2022), Díli-Ospitál Nasionál Guido Valadáres (HNGV), Sesta (26/08/2022), selebra loron valór HNGV nian ho tema “Justisa Domin”.

Selebra loron valór HNGV nian ho misa agradesimentu, Sesta (26/08/2022). Foto/Espesiál

Iha selebrasaun ida-ne’e hahú ho misa agradesimentu ne’ebé mak preside hosi Reverendísimu Padre Augosto Galhos iha Kapela HNGV, Díli.

Iha omilia, Padre Augusto Galhos husu bá servidór sira iha HNGV , hahú hosi médiku ka doutór sira, enfermeiru no enfermeira sira, inklui lideransa sira iha HNGV nian, atu  halo reflesaun.

“Iha loron valores ne’e atu  halo reflesaun fila-fali bá lideransa no pesoál servisu  nia karakter, hahalok, prezensa no servisu sira  atu bele sai vantajen no benefísiu iha dalan pozitivu hodi moris ne’e  haksolok ho kontente. Iha loron valores ida ne’e atu haree fila fali Pesoál Saúde sira-nia prezensa iha ema seluk nia leet liuhosi atendimentu, hamnasa no hatudu kualidade serbísu,” Padre Augusto Galhos,  hateten.

Kona-bá justisa, Padre Augusto dehan, justisa nu’udár lideransa no servidór, tenke hako’ak ema hotu, la husik ema ida bá atende ema seluk no la iha diskriminasaun bá grupu ne’ebé ki’ik, ho nune’e Justisa ho Domin ne’ebé loos mak, atu atende ema ho domin la haree ba ema ki’ik ka boot.

Misa loron valores HNGV ne’e partisipa hosi Xefe Gabinete HNGV, Xefe Departamentu HNGV, Asesór Étika, Profisionál HNGV, Country Manager SJOG ho staff, Xefe Unidade HNGV no mós Médiku, Enfermeiru, Parteira, Tékniku aliadu sira no funsionáriu sira tomak ne’ebé durante hala’o kna’ar iha HNGV.

Jornalista: Rogério Pereira Cárceres