Defensor Públiku Simu Osan hosi Kliente Kategoria Krime Korrupsaun

Hatutan.com, (31 Agostu 2022), Díli-Ezisténsia Defensoria Públiku (DP) atu fó asisténsia legal  bá ema ne’ebé laiha kapasidade ekonomia, maibé la taka dalan mós bá ema hirak ne’ebé iha kapasidade ekonomia, maibé ho kondisaun katak Defensoria Públiku labele simu kualkér pagamentu (osan ka sasan) hosi kliente sira.

Lee Mós : Defensór Públiku Na’in-tolu Simu Posse Hodi Koloka ba Munisípiu Tolu

PM Taur parabeniza Defensór Públiku Jerál, Câncio Xavier iha ámbitu tomada posse hanesan Defensór Públiku Jerál tinan hirak liubá. Foto/Dok. Governu

“Ezisténsia Defensoria Públiku tuir filozofia  ne’ebé iha maka defende ema sira ne’ebé kbiit laek no laiha kapasidade ekonómika. Sira ne’ebé maka iha kapasidade ekonomia hetan asisténsia hosi Defensoria Públiku bele, maibé importante la bele halo pagamentu no kliente sira tenke selu de’it taxa judisiáriu tanba Governu selu ona Defensoria Públiku liu husi saláriu kada fulan, tanba ne’e karik iha provas ruma kona-bá kliente halo pagamentu bá Defensoria Públiku bele relata mai ami, nune’e bele prosesa tanba ofisial ajente  administrasaun publika ne’ebé husu onoráriu bá nia kliente ne’e kategoria krime korrupsaun no bele hetan sansaun disiplinár no demisaun tuir kategoria erru ne’ebé komete bazeia bá estatutu Defensoria Públiku” Defensór Públiku Jerál, Câncio Xavier hateten bá Hatutan.com via telefónika, Kuarta (31/08/2022).

Câncio Xavier husu bá entidade hotu tenke komprende kona-bá asisténsia Defensoria Públiku no bainhira iha provas ruma kona-bá selu bele relata no hato’o keixa, tanba Defensoria Públiku iha plantaun ne’ebé kolokadu ona hodi fó asisténsia bá kliente sira iha kualkér tempu no gratuita.

Daudaun ne’e ekipa halo inspesaun bá inspetór sira hodi rekolla reklamasaun hosi kliente no balun iha prosesu investigasaun bá prosesu deliberasaun kona-bá aktu Defensoria Públiku ne’ebé kontra kódigu  étika no estatutu Defensoria Públiku.

Bazeia bá rezultadu inspesaun iha tinan 2021, iha Defensoria Públiku nian-rua (2) inklui ofisial na’in-haat (4) ne’ebé hetan ona sansaun administrativa hodi halo transferénsia obrigatóriu tanba viola regra liu-liu estatutu Defensoria Públiku.

Jornalista : Carmelita Isaac