Papa Francisco Selebra Misa Agradesimentu bá Kardeál Sira

Hatutan.com, (31 Agostu 2022), Díli-Papa Francisco, Tersa (30/08/2022), oras Roma, selebra misa agradesimentu bá kardeál na’in-21  iha Igreja Bazílika Satu Pedro, Vatikanu.

Lee Mós : Kardeál Foun Sai Roman bá Sarani Tomak Maromak Nian

Papa Francisco selebra misa agradesimentu bá Kardeál sira iha Roma, Tersa (30/08/2022). Foto/Media PR

Misa ne’e hala’o hafoin kardeál sira simu konsultóriu ordináriu públiku iha loron 27 fulan-Agostu liubá no misa ne’e partisipa direita hosi sarani rihun resin, inklui sarani timoroan sira  hamutuk ho Enviadu Espesiál Estraordináriu Prezidente Repúblika, Kay Rala Xanana Gusmão.

Bá Kardeál na’in 21 ne’ebé hola parte ona iha Koléjiu Kardinalísiu, Papa Francisco husu atu halo igreja sai atraiante.

“Lia-fuan Maromak hamosu ita-nia administrasaun iha igreja, sai igreja! No ida-ne’e mak sai atraiante bá komunidade fiar na’in sira, dahuluk bá aan rasik no depois bá ema hotu: duplo mistériu ne’e hetan bensan hosi Kristu no bá Kristu iha mundu. Admirasaun ida-ne’e la hamenus hosi ita tinan bá tinan, neim menus mós iha responsabilidade bá Igreja. Grasa Maromak nian. Hametin, halo sai kle’an. Ha’u fiar katak, hanesan nne’e mós ba imi, maun-alin sira ne’ebé hola parte iha Koléjiu Kardinalísiu,” Papa Francisco hateten.

Liuhosi komunikadu imprensa hosi Palásiu Prezidensiál bá Hatutan.com, haktuir Papa husu bá kardeál sira kontinua servisu makaas, hodi sai nu’udar ilas Na’i Jesus no Santu sira hotu no hadomi Igreja no sarani nu’udar Nai Kristu Nia maksoin hodi lori dame bá ema hotu iha moris.

Tuir ajenda, loron kuarta (31/08/2022), oras Roma nian, Enviadu Espesiál Estraordináriu Prezidente Repúblika, Kay Rala Xanana Gusmão no Sua Eminénsia Kardeál Dom Virgílio do Carmo da Silva, SDB hamutuk ho Embaixadora Timor-Leste ba Vatikanu, Juvita Rodrigues B. Ataide Gonçalves no k timoroan sira iha Roma sei selebra misa agradesimentu bá kardeál foun.

Iha ambitu misa agradesimentu ne’e ho timoroan sira ne’e Kardeál Dom Virgílio ho Xanana Gusmão sei hato’o mensajen bá timoroan sira iha Italia.

Jornalista : Vito Salvador