Arguidu FA Kumpre Prizaun Preventiva Tanba Konsidera Hanesan Trafikante Droga

Hatutan.com, (04 Setembru 2022), Díli—Tribunál Distritál Dili (TDD), liuhosi prosesu primeiru Interrogatóriu iha Domingu, 04 Setembru 2022, aplika ona medida koasaun Prizaun Preventiva ba argudu FA, tanba konsidera hanesan trafikante ba ai-moruk droga mai Timor-Leste (TL).

Tribunál Distritál Dili (TDD), liuhosi prosesu primeiru Interrogatóriu iha Domingu, 04 Setembru 2022, aplika ona medida koasaun Prizaun Preventiva ba argudu FA, tanba konsidera hanesan trafikante ba ai-moruk droga mai Timor-Leste (TL). Foto/Hatutan.com.

Iha prosesu primeiru interrogtóriu ne’e, Ministériu Públiku alega prizaun preventiva ba arguidu no promove iha lei númeru 02/2017, artigu 07 kona-bá kazu ilísitu ba droga.

Lee Mós:Iha Relasaun ho Arguido Na’in-Sia Kazu Droga, Suspeitu FA Submete bá PI

Parte defeza hosi arguidu FA nian husu ba Tribunál atu aplika medida koasaun aprezentasaun periódika no Termu Identidade Rezidénsia (TIR), tanba laiha faktus komprovativu katak, arguidu mak lori droga mai TL.

Hafoin rona tiha parte hotu, TDD deside aplika medida koasaun prizaun preventiva ba arguidu, tanba konsidera hanesan trafikante ba ai-moruk droga.

“Ha’u sei halo rekursu tanba desizaun ne’e diferensa oitoan. Kuaze kazu ne’e hanesan de’it. Kazu ne’e mai ho kazu ida de’it, mai ho ema na’in-sia ne’ebé mak iha inísiu kazu ne’e ha’u mak kaer. Kazu droga ne’e, provas ne’e polísia kaer no lori mai iha Tribunál, sira aplika koasaun ne’ebé mak aprezentasaun periódika,” Defensór Públiku, Estáquio Guterres hateten hafoin primeiru interrogatóriu iha TDD, Díli, Domingu (04/09/2022).

Tribunál Distritál Dili (TDD), liuhosi prosesu primeiru Interrogatóriu iha Domingu, 04 Setembru 2022, aplika ona medida koasaun Prizaun Preventiva ba argudu FA, tanba konsidera hanesan trafikante ba ai-moruk droga mai Timor-Leste (TL). Foto/Hatutan.com.

Arguidu agora daudaun ne’e, nein iha provas ruma, laiha evidénsia ida no polísia buska iha ne’ebá, la hetan buat ida, maibé bazeia de’it ba deklarasaun arguidu ida primeiru, ida na’in-sia ne’e, deklarasaun ida-ne’e Tribunál hola desizaun hodi aplika medida koasaun ne’ebé mak prizaun preventiva, ka mantein ho TIR.

Estaqui Guterres ladun aseita ho desizaun hosi TDD nian, tanba desizaun ne’e rasik, kontradiz ho desizaun ida primeiru ne’ebé mak aplika ba arguidu na’in-sia. Tanba arguidu na’in-sia ne’e iha duni provas ka evidénsia droga, maibé Tribunál aplika medida koasaun TIR ho aprezentasaun periódika ba sira.

“Arguidu ida ne’e mai, nein iha provas, laiha provas ida hetan iha nia uma, depois mai iha ne’e Tribunál aplika prizaun preventiva, tanba de’it dehan deklarasaun arguidu na’in-rua, ida mak temi arguidu nia naran. Ida-ne’e mak defeza hakarak atu halo rekursu ba ida-ne’e,” Estaquio Guterres, lamenta.

Iha kinta, (01/09/2022), Policia Ciêntífica e de Investigaao Criminal (PCIC), ezekuta Mandado de Busca Apreensão e Detenção hosi TDD, hodi halo buska ba arguidu FA nia rezidénsia iha área Bekaril, Metiaut, Díli, inklui halo ona mós detensaun ba FA durante oras 72.

Audiénsia julgamentu ne’e prezide hosi Juíz singulár Maria Solana, Ministériu Públiku (MP), reprezenta hosi Prokudadór Domingos Gouveia Barreto no Estaquio Guterres nu’udár Defensór Públiku.

Jornalista: Rogério Pereira Cárceres