Ramos-Horta Hato’o Sentidu Lutu ba Raiña Elizabeth II Nia Mate

Hatutan.com, (09 Setembru 2022), Díli—Prezidente Repúblika (PR) José Ramos-Horta hato’o profunda sentidu kondolénsia ba Raiña Elizabeth II ne’ebé mate iha Kinta (08/09/2022).

Raiña Elizabeth II. Foto Espesiál

“Ba Povu Britániku ho komunidade nasaun aliadu sira, ha’u lori povu Timor Leste nia naran hato’o sentidu kondolénsia iha momentu triste ida ne’ebé imi sente lakon Raiña ne’ebé imi hadomi,” Ramos-Horta hateten iha komunikadu.

Lee Mós: Raiña Elizabeth II Mate, Prínsipe Charles Mak Sei Sa’e ba Tronu Impériu Britâniku

Ramos-Horta hateten katak, povu Timor Leste hamutuk ho povu Britániku iha sira nia tristeza no povu Britániku iha povu Timor Leste nia fuan.

Hanesan Laureadu Nobel ba Pás nian, Ramos-Horta ho Povu Timor Leste iha esperansa katak, Povu Britániku hetan duni naroman hosi Raiña Maktoban ninia kontribuisaun extraordinária durante ukun iha tronu Impériu Britániku durante tinan 70 nia laran.

“Xanana Gusmão eis Prezidente Repúblika no Eis Primeiru Ministru Timor Leste nian ne’ebé povu ne’e hadomi, hetan agradesimentu, apresiasaun no ondra hanesan Kavaleiru da Grande Kruz hosi Ordo St. Michael no St. George hosi Raiña Elizabeth II iha tinan 2003,” Ramos-Horta hateten.

Agradesimentu ba prémiu ne’e sai nu’udár ondra boot id aba Xanana Gusmão no liu hosi nia mak Timoroan sira hetan rekoñesimentu ba sira nia luta no sakrifísiu.

Ramos-Horta rekoñese no konsidera katak, Raiña Elizabeth II hanesan Liurai feto ne’ebé admirada tebes iha mundu no koñesida ho nia dedikasaun durante nia vida tomak.

“Hein katak, nia deskansa ho pás rohan laek no Maromak haraik bensa ba nia,” subliña.

Jornalista: Cipriano Colo