Lú Olo Baixa iha HNGV Tanba Kondisaun Saúde Fraku Uitoan

Hatutan.com, (13 Setembru 2022), Díli—Prezidente Repúblika períodu 2017-2022, Francisco Guterres “Lú Olo”, oras ne’e, hala’o hela tratamentu iha Hospital Nasionál Guido Valadares (HNGV) tanba kondisaun saúde fraku uitoan (presiza deskansa).  

Lee Mós : Lú Olo-Alkatiri Re-eleitu, LAT: Labele Lakon Esperansa

Prezidente partidu FRETILIN, Francisco Guterres “Lú Olo”. Foto/foti hosi pajina Facebook Fretilin – Ba Timor-Leste Ida Buras Liu

Atuál Prezidente partidu FRETILIN ne’ebé foin re-eleitu iha kongresu nasionál da-limak partidu FRETILIN nian ne’e   lori bá iha HNGV iha Segunda kalan (12/09/2022), hodi halo tratamentu no tenke submete bá baixa ka deskansa iha HNGV.

Prezidente Asembleia Konstituinte ne’e  hala’o hela tratamentu iha sala VIP númeru 01 iha HNGV.

Informasaun ne’ebé Hatutan.com asesu hosi fontes kredivel sira iha HNGV ne’ebé dezmente atu publika nia identidade hateten, eis Prezidente Repúblika ne’e hala’o hela tratamentu ka deskansa hela iha sala VIP númeru 01 HNGV tanba kondisaun saúde fraku uitoan  hafoin loron tolu la deskansa hodi partisipa ativu iha Kongresu Nasionál FRETILIN ba da-limak, foin lalais ne’e.

“Prezidente Francisco “Lú Olo” presiza deskansa tanba kolen uitoan no presiza deskansa,” fontes iha HNGV ne’e hateten.

Iha loron tuir mai, Tersa (13/09/2022), Primeiru-Ministru (PM), Taur Matan Ruak,  eis Primeiru-Ministru Mari Alkatiri nu’udár mós Sekretáriu Jerál partidu FRETILIN  ho membru Governu sira balun  mós hala’o ona vizita hodi haree kondisaun saúde Francisco Guterres “Lú Olo” nian ne’ebé hahú rekupera no bele dehan estavel daudaun.  

Pájina Facebook Fretilin – Ba Timor-Leste Ida Buras Liu

Hosi sorin seluk, informasaun ne’ebé Hatutan.com sita hosi pájina Facebook Fretilin – Ba Timor-Leste Ida Buras Liu relata katak prezidente FRETILIN no eis Prezidente  Repúblika, Francisco Guterres “Lú Olo” dadauk ne’e simu hela atensaun medika sira ne’ebé presiza hosi doutor sira iha Hospital Nasional Guido Valadares (HNGV).

Lú-Olo nia kondisaun estavel no diak ba beibeik. Tuir lolós, Prezidente partidu FRETILIN ne’e tenke bá Malayzia hodi hala’o ninia check-up regular iha fulan-Agostu liubá. Maibé, tamba serbisu polítiku, nia seidauk bele ba. Nune’e, bainhira ninia kondisaun fízika rekupera iha loron hirak tuir mai ne’e, nia sei deside atu halo viajen ba Malayzia atu hala’o check-up regular ne’ebé liu tiha ona tempu tuir médiku sira determina.

Familia presidente Lú Olo ho familia bo’ot FRETILIN agradese Doutor sira  nia atensaun tomak no ema hotu hotu ne’ebe preokupa ho nia kondisaun.

Jornalista : Vito Salvador