Xefe Estadu Sei Buka Hatene Investigasaun Kona-bá Padre Abito ho José Bernardo Nia Mate

Hatutan.com, (13 Setembru 2022), Díli- Xefe Estadu José Ramos-Horta, sei buka hatene informasaun kle’an kona-bá prosesu investigasaun bá matebian Padre Abito José Casmiro Brites ne’ebé deskonfia hetan asidente iha Dare ho José Bernado ne’ebé mate ho hatalik iha sela detensaun Komandu Polisia Nasionál Timor-Leste (PNTL) Munisípiu Díli.

Lee Mós : Autópsia Mate Isin José Bernardo, “Mamiik Nakfera” no “Ook Metan”

Prezidente Repúblika, José Ramos-Horta. Foto/Elio dos Santos da Costa

Kazu rua-ne’e halo família no públiku hein hela nia rezultadu autópsia no rezultadu investigasaun hosi autoridade kompetente sira. Infelizmente, to’o ohin loron, prosesu ne’e taka metin ba publiku no la iha transparente.

Prezidente Repúblika hanesan mós Komandante Supremu Forsa Defaza nian, José Ramos-Horta la halo akompañamentu ida konkretu, nune’e  nia promete sei hakle’an informasaun hosi autoridade relevante sira atu bele hatene.

“Ha’u la akompaña konkretu ne’e, orasida ha’u sei husu situasaun ne’e saida? Agora foin mak rona ita hateten ne’e, portantu ha’u to’o office, ha’u ba husu kedas informasaun konkretu kona-bá ida-ne’e.” Xefe Estadu José Ramos-Horta haten hodi responde Hatutan.com bainhira hala’o vizita bá Eskola Portugés Balide, Díli, Tersa (13/09/2022).

Tuir kronolojia ne’ebé Polísia rona direta hosi sasin ida ho inisiál MSR ne’ebé hetan asidente hamutuk ho Padre matebian katak asidente ne’e akontese maizumenus iha tuku 20:00 Otl, iha área Dare, Munisípiu Díli.

Hosi asidente tráfegu ne’e, rezulta Padre Abito José Brites Casimiro mate kedan iha fatin akontesimentu, maibé kondisaun motór ho marka Jupiter MX, Xapa Matríkula E 8081, ne’ebé sira utiliza ninia kondisaun ‘di’ak hela’.

Kona-bá matebian José Bernardo nia mate, antes ne’e, PNTL Suspeita matebian nu’udár suspeitu bá kazu konfrontu ida iha área Audian nian, tanba envolve iha agresaun fízika hasoru vítima ne’ebé mós foin lalais hakotu ona iis.

Lee Mós : Rezultadu Autópsia Mate-isin Padre Abito Submete bá Ministériu Públiku

Ho kazu ne’e, ikus mai PNTL tun bá terrenu hodi kaptura suspeitu José Bernardo, lori bá detein iha sela detensaun Komandu Munisípiu Dili, iha Caicoli. Infezlimente iha Kinta (01/09/2022), suspeitu mate iha sela laran ho kondisaun tali iha kakorok.

Hafoin akontesimentu kazu insidente ne’e, ekipa konjunta liuhosi Polisia Nasionál Servisu Investigasaun Kriminál Nasional (SIKN), Forensik PNTL, Prokuradoria Jerál Repúblika (PJR), Provedora dos Direitus Humanos no Justisa (PDHJ), akompaña hela prosesu kazu ne’e, nune’e iha rezultadu ne’ebé transparente bá públiku.

Jornalista: Vito Salvadór