PNTL Husu Pessoál Seguransa Na’in-40 Iha HNGV Labele Hatudu Kór Arte Marsiál-Polítika

Hatutan.com, (19 Setembru 2022), Díli—Polísia Nasionál Timor-Leste (PNTL) liuhosi Komandante Operasaun Nasionál, Superintendente Xefe Polísia, Pedro da Costa Belo husu bá Pessoál Seguransa na’in-40 ne’ebé hala’o seguransa iha Hospitál Nasional Guido Valadáres (HNGV) atu labele hatudu kór arte marsiál ho kór politika durante hala’o kna’ar.

Komandante Operasaun Nasionál, Superintendente Xefe Polísia, Pedro da Costa Belo.

Komandante Pedro Belo husu ne’e, bainhira reprezente Komandante Jerál PNTL iha serimónia assinatura akordu kooperasaun entre komandu PNTL ho Ministériu Saúde (MS) liuhosi HNGV, iha Centro de Formação da Policia (CFP), Akademia Comoro.

Lee Mós: Servidór HNGV Halo Reflesaun

Pedro Belo konsidera kursu ida-ne’e nu’udár kursu ne’ebé importante tebetebes tanba kursu ba pessoál seguransa presiza liu iha koñesimentu téknika no tátika. Bainhira laiha koñesimentu maka hanesan ema baibain ne’ebé mak hamri’ik iha odamatan.

Nia rekoñese katak, situasaun iha HNGV dala-balun mosu protestu hosi família pasiente ho médiku sira tanba la satisfás ho sistema atendimentu, inklui ho pessoál seguransa sira rasik dala-ruma tanba la autoriza sira hodi tama bá vizita sira nia familia ne’ebé moras.

“Bainhira maluk sira termina ona imi nia an bá iha kuadru seguransa, buat ida mak imi labele halo. Labele lori imi nia organizasaun ba iha fatin ne’ebá, labele lori partidu ba iha fatin ne’ebá, labele lori kór oioin ba iha ne’ebá,” Superintendente Xefe Polísia, Pedro Belo hateten iha edifísiu CFP Akademia PNTL, Comoro.

Komandante Operasaun PNTL ne’e, fó-hanoin katak, hanesan pesoál seguransa iha papél maka tenke kuidadu materiál sira ne’ebé asegura iha ne’ebá, kontrola ema sira ne’ebé bá ninia familia moras no bá halo tratamentu baixa iha Ospitál Bidau.

“Sé imi tau imi nia an didi’ak bá Ospitál, maka ema mós sei respeitu imi. Mas kuandu imi lori sira ne’e bá iha ne’ebá maka ema sei la respeitu imi, no ema sei halo problemas ho imi,” Pedro Belo, fó hanoin.

Bainhira mosu problema ruma iha HNGV, sei fó impaktu ba pasiente sitra ne’ebé baixa iha ospitál, médiku sira ne’ebé servisu fó atendimentu, inklui familia sira ne’ebé mak halo vizita bá Ospitál.

Pessoál Seguransa na’in-40 ne’ebé hala’o seguransa iha Hospitál Nasional Guido Valadáres (HNGV) tuir formasaun iha Centro de Formação da Policia (CFP), Akademia Comoro, Segunda (19/09/2022).

Diretór Diresaun Administrasaun no Finansas (DAF) iha HNGV, Raúl Humberto Gama esplika, guarda seguransa sira ne’e tenke tuir formasaun kona-bá seguransa, tanba fó asisténsia seguransa iha HNGV la’ós hanesan ho edifísiu baibain.

Pessoál seguransa sira ne’e, dala-ruma sira tenke  halo movimentu hodi fó seguransa to’o oras 24, iha arredór sira HNGV nian. Halo atendimentu bá pasiente sira, vizitante sira pasiente nian, inklui funsionáriu sira iha ne’ebé servisu.

“Entaun, presiza iha kapasitasaun atu oinsá servisu  intermu profisionál ne’e pelumenus, sira iha kapasitasaun. Servisu hamutuk ho senteru formasaun Polísia nian. Ohin, ita hala’o abertura ba guarda seguransa HNGV ne’ebé mak fahe ba faze rua. Faze primeira nain 20 sei tuir durante loron 10 no faze segunda, na’in 20 loron 10,” Raúl Humberto Gama, hateten.

Formasaun bá pessoál seguransa sira ne’e parte formadór sira iha CFP Akademia Comoro sei oferese liu-liu matéria kona-bá komunikasaun, maneira oinsá uza stik, patrullamentu, oinsá guarda sira uza atu halo tráfiku iha HNGV, nomós oinsá sira atu halo komunikasaun bá iha vizitante sira ne’ebé mak atu bá vizita familia.

Jornalista: Rogério Pereira Cárceres