Falur Kontente ho Prezensa Kadete Foun 600, Sei Rekruta Rejime Espesiál

Hatutan.com, (20 Setembru 2022), Díli—Instituisaun FALINTIL Forsa Defeza Timor-Leste (F-FDTL) liu hosi Komisaum Rekrutamentu, iha Tersa 20 Setembru 2022, transporta ona kadete foun na’in-600, hodi tuir formasaun kona-bá militár nian durante fulan tolu iha Centro de Formação e Treino (CFT), Komandante Nicolau Lobato, Metinaro.

Xefe Estadu Maiór FALINTIL-Forsa Defeza Timor Leste (F-FDTL), Tenente Jenerál Falur Rate Laek. Foto/Elio dos Santos da Costa.

Xefe Estadu Maiór F-FDTL, Tenente Jenerál Domingos Raúl ‘Falur Rate Laek’ orgullu tanba ho prezensa hosi kadete foun sira ne’ebé inkorpora daudaun ona iha instituisaun armada ne’e bele hasa’e liután kuantidade membru sira nian.

Lee Mós: Kandidatu 600 Selesionadu ba Membru Foun F-FDTL, 20 Setembru Hahú Treinamentu

“Ha’u kontente tanba simu tán ema foun foinsa’e sira ne’e. Durasaun ba treinamentu ne’e, uluk estabelese fulan neen. Mais agora, ha’u haree báziku ne’e maka fulan tolu,” Falur Rate Laek hateten iha baze Komponente Terrestre Primeiru Batallaun nian, iha Lanud Baucau, Tersa (20/09/2022).

Oras-ne’e dadaun, Komponente Terrestre eziste ona batallaun rua, ida iha Baucau no ida mak iha Metinaro. Maibé, Falur Rate Laek hakarak Komponente Terrestre tenke dezenvolve to’o Brigada ida.

“Ha’u nia objetivu ne’e, antes de misaun tinan rua ka tolu ha’u sai ne’e, ha’u hakarak komponente Terrestre tenke iha brigada ida. Depois iha komponente Navál, tenke iha destakemtnu rua atu ekivále estrela iha ha’u nia kabás-leten. Sé la’e, ema dehan nia jenerál fitun 10, mais nia soldadu na’in-rua de’it,” Tenente Jenerál Falur Rate Laek, hateten tán.

Rekrutamentu ida ne’ebé foin lalais halo no oras-ne’e, kadete foun sira hahú tama bá treinamentu ne’e konsidera hanesan rekrutamentu massál. Tanba ne’e, kompromete katak, iha tinan oin 2023, sei loke tán rekrutamentu foun bá rejíme espesiál nian.

Iha faze rekrutamentu tuir mai, sei eskolla liu sidadaun hirak ne’ebé iha kapasidade edukasaun ho nível doutoramentu nian atu nune’e bele dudu dezenvolvimentu forsa armada nian aranka ba oin.

“Tinan oin mai ha’u iha planu atu halo rekrutamentu ba rejíme espesiál  ba sira ne’ebé doutoramentu ne’e, sira ne’ebé ho edukasaun altu la’ós lisensiatura atu mai deut malu tun-sa’e iha ne’ebá, hakarak matenek atu lori forsa ne’e ba oin. Sira ne’ebé analista, sira ne’ebé tékniku, jurista sira, enjiñeiru tékniku sira, consultant sira, sira ne’ebé formadu iha finansas, konstitusionalista sira, atu  fó impulsu maka’as ba avansu forsa nian,” Tenente Jenerál Falur Rate Laek, kompromete.

Tuir planu, matéria ne’ebé sei aprende iha formasaun militár maka Regulamentu Dixiplina Militár (RDM), Regulamentu Uniforme (RM), Regulamentu Kontinénsia bá Ónra (RKO), no Regulamentu Jerál Servisu Unidade nian (RJSU).

“Rejíme espesiál, bá tékniku professional. Ne’e mai treinu de’it sira idade boot ne’e, sira ne’ebé doutoramentu ne’e la’ós sira ida 18 ka 19 anus. Sira mai, fó treinu báziku de’it, hanorin sira ne’e de’it, tula deviza ba sira nia leten, sai ofisiál, sira servisu tékniku profesionál,” Falur Rate Laek, afirma tán.

Jornalista: Rogério Pereira Cárceres