Matebian José Bernardo bianhira sei moris hatais kamiza organizasaun arte-marsiál PSHT no imajen ilistrasaun tara-aan iha sela polísia. Foto/Repro Espesiál
Portavós komandu jerál PNTL, Superintendente Xefe Armando Monteiro, informa, ligasaun ho kazu ne’e, parte komandu mós demite tán membru na’in-ida (1), hamutuk tán sira na’in-ualu (8) ne’ebé antes ne’e hetan ona suspensaun.
“Hosi akontesimentu ida-ne’e, hafoin komandu jerál forma ekipa internal, hodi nune’e halo investigasaun bá membru na’in-ualu, no hosi investigasaun ida ne’e, komandu mós foti desizaun bá membru ida tán, hamutuk na’in-sia (9) ona. Prosesu investigasaun internal remata tiha ona, no ekipa konjunta ne’e aprezenta ona bá ita nia nível estratéjia, hodi nune’e, bele estuda no deside,” portavós Komandu Jerál PNTL, Superintendente Xefe Armando Monteiro, hateten bá jornalista sira liuhosi konferénsia imprénsa iha Kuartel Jerál PNTL, Sesta (23/09/2022).
Advertisement
Maske prosesu investigasaun bá kazu ne’e konkluidu, maibé asuntu sira kriminál nian, PNTL entrega ba Polícia Ciêntífica e de Investigação Criminál (PCIC), no parte internal nian, komandu PNTL hamutuk ho Ministériu Públiku (MP), Provedória dos Direitos Humanos e Justiça (PDHJ), ne’ebé mak oras ne’e, sira haruka bá ona parte politiku sira iha nível Komisaun B Parlamentu Nasionál.
“Sé prosesu ida ne’e mak hetan iha indísius krime ruma, entaun, ida ne’e mós sei sai informasaun ida, nune’e kompleta bá prosesu krime ninian,” Armando Monteiro hateten.
Insidente iha sela detensaun PNTL Munisípiu Díli ne’e rezulta vítima José Bernardo, mate ho kondisaun tali kesi-metin iha kakorok no tara nia (atu hanesan ema tara-aan) iha Segunda kalan (01/09/2022), hale’u tuku 21:00 Otl.
PNTL Suspeita matebian José Bernardo nu’udár suspeitu bá kazu konfrontu ida, tanba halo agresaun hasoru vítima balun iha seremónia festa graduasaun ida iha área Audian, Postu Administrativu Na’in-Feto, Munisípiu Díli.
Ho kazu ne’e, ikus mai PNTL simu keixa, no tun bá lokál krime, hodi kaptura suspeitu José Bernardo lori bá detein iha sela detensaun Komandu Munisípiu Dili to’o nia hakotu iis liuhosi meius atu hanesan hatalik-aan.