Ramos-Horta ho Primeira Ministra Nova Zelándia  Diskute Asuntu Pás Mundiál

Hatutan.com, (25 Setembru 2022), Díli—Prezidente Repúblika (PR), José Ramos-Horta hala’o enkontru ho Primeira-Ministra Nova Zelándia, Jacinda Ardern hodi diskute asuntu internasionál sira ba pás mundiál.

Prezidente Repúblika (PR), José Ramos-Horta hala’o enkontru ho Primeira-Ministra Nova Zelándia, Jacinda Ardern hodi diskute asuntu internasionál sira ba pás mundiál. Foto/Média PR.

Enkontru Xefe Estadu ho Primeiru-Ministru Nova Zelándia ne’e hala’o iha Nova Iorke hafoin partisipa iha Asembleia Jerál Organizasaun Nasoens Unidas (ONU) ba dala-LXXVII ne’ebé hala’o iha Estadu Unidus Amérika (EUA).

Lee Mós:Nova Zelándia Sei Apoia Polisiamentu Komunitária Durante Tinan Tolu

Enkontru ne’e rasik, partisipa hosi Ministra Negósiu Estranjeiru no Kooperasaun, Adaljiza Magno no Embaixadór Timor-Leste ba ONU, Carlito Nunes no seluk tán.

Prezidente Repúblika, José Ramos-Horta informa enkontru ho Primeira-Ministra Nova Zelándia ko’alia liu kona-bá situasaun internasionál liu-liu kona-bá funu entre Ukráina ho Russia ne’ebé fó impaktu ba mundu inklui, Timor-Leste.

“Ami ko’alia liu-liu kona-bá situasaun internasionál balun, klaru hotu-hotu ko’alia kona-bá problema boot iha Ukraina, tanba konflitu Rússia ho Ukráina ne’e impaktu ba mundu tomak inklui ba ita, através de problemas, sansoens, komérsiu internasionál hetan impaktu entaun folin sasán sa’e iha mundu. Tanba ne’e mak impaktu ita diretamente, Timor-Leste nia pozisaun klaru ba ida-ne’e. Maibé, ko’alia mós kona-bá Myamar, ita labele ko’alia de’it kona-bá funu iha dook hanesan Ukráina, maibé la ko’alia kona-bá buat ne’ebé akontese iha ASEAN nia klaran hanesan Myanmar,” Hatutan.com sita komunikadu.

Xefe Estadu konsidera, relasaun bilaterál Timor-Leste nian ho Nova Zelándia hanesan prioriodade nasionál hanesan mós Austrália ho Indonézia no seluk tán.

“Ne’e duni relasaun bilaterál ho Nova Zelándia ha’u konsidera hanesan prioridade nasionál importante hanesan ita-nia relasaun ho Austrália, importante hanesan ita-nia relasaun ho Indonézia no rai sira seluk hanesan Singapura. Maibé haree mós ba possibilidade Timor-Leste ho Nova Zelándia atu inkrementa liu-tán relasaun bilateral, ne’e mak ko’alia di’ak ho señora Primeira-Ministra Nova Zelándia,” subliña.

Nova Zelándia mós fó apoiu makas tebes ba Timor dezde iha tempu luta, tanba iha 1999 Nova Zelándia ho nasaun sira seluk mak halo negosiasaun no mediasaun hodi hatama forsa INTERFET mai Timor-Leste.

Nune’e mós iha krize 2006, Nova Zelándia kontinua apoiu forsa mai Timor-Leste hodi fó apoiu seguransa iha Timor.

Jornalista: Vito Salvadór