Komandu PNTL Introdús Sistema Dijitál Jestaun Asidente bá Komandante Munisipál Sira

Hatutan.com, (26 Setembru 2022), Díli—Komandu Polísia Nasionál Timor-Leste (PNTL), liuhosi departamentu Informasaun Komunikasaun no Teknolojia (ICT-Sigla Inglés), organiza workshop ida, hodi introdús sistema dijitalizasaun ka online, kona-bá Jestaun insidente ho asidente tráfegu, bá komandante sira hosi munisipiu 12 inklui Rejiaun Administrativa Espesiál Oecusse Ambeno (RAEOA), iha Sentru Formasaun Polisia (CFP-Sigla Português) Comoro, Díli, Segunda (26/09/2022).

Komandu Polísia Nasionál Timor-Leste (PNTL), liuhosi departamentu Informasaun Komunikasaun no Teknolojia (ICT-Sigla Inglés), organiza workshop ida, hodi introdús sistema dijitalizasaun ka online, kona-bá Jestaun insidente ho asidente tráfegu, bá komandante sira hosi munisipiu 12 inklui Rejiaun Administrativa Espesiál Oecusse Ambeno (RAEOA), iha Sentru Formasaun Polisia (CFP-Sigla Português) Comoro, Díli, Segunda (26/09/2022).

Komandante Jerál PNTL, Komisáriu Polísia Faustino da Costa hateten, sistema dijitalizasaun ne’e, mosu kleur loos ona no kuaze ema barak mak utiliza iha sira ninia servisu fatin liu-liu oinsá komandante sira monitoriza no halo akompañamentu bá servisu sira.

Lee Mós: PNTL Halo Apreensaun bá Kamioneta Tolu Hosi Indonézia Tula Sasán Merkadoria

Iha pandemia globál Covid-19 ne’ebé afeta mós bá populasaun iha TL ne’e, lori impaktu ne’ebé di’ak, tanba maske limita ema ninia movimentu iha fatin públiku, maibé hanorin sidadaun sira atu servisu iha de’it uma ka fatin sira servisu nian, liuhosi sistema online.

“Foku liubá sistema jestaun insidente ho asidente ninian. Jestaun insidente buat ida ke komandante sira akompaña, tanba hosi akontesimentu sira, komandante sira dezeña ninia planus de operasaun,” Faustino hateten.

Iha ámbitu workshop ne’e, komandante munisipiu sira bele kontinua apár ho prioridade sira governu nian, Governu Eletrónika.

Entaun, ho sistema ida ne’ebé mak instaladu ne’e, komandante sira bele utiliza iha servisu fatin ho efikásia, efisiente, no ne’e importante.

Nia fó ona orientasaun bá komandante munisipiu sira atu bá oin  labele iha tán dadus ne’ebé diferente, liu-liu dadus sira kona-bá kazu insidente no asidente tráfegu ne’ebé mak sempre mosu iha kada loron.

Komis’ariu ne’e mós fó  ezemplu katak, bainhira situasaun iha kapitál Dili, asidente ida ne’ebé envolve parte rua tantu motór ho motór, normalmente bainhira polisia bá, sidadaun sira  sempre hakarak rezolve mesak sira-ninia problema.

Komisáriu Polísia Faustino da Costa.

“Sira ko’alia ba malu rezolve mesak tiha, depois sira bá konsulta iha Ospitál hodi halo tratamentu. Saida mak sistema ne’e haruka, dezde kuandu iha ona insidente ruma, polisia tún nia tenke rejísta, nia tenke prosesa ida ne’e. Kona-bá atu rezolve mesak ne’e imi nia problema,” nia hateten tán.

Parte PNTL hatene di’ak situasaun iha terrenu, baibain sira ne’ebé hakarak atu rezolve mesak sira-nia problema kona-bá asidente ne’e, dala-ruma transporte ne’ebé sira kondús, laiha kondisaun liu-liu hanesan, laiha dokumentu sira motór nian, asesoria la kompletu no balun laiha karta kondusaun.

Tuir planu, komandu PNTL sei sosializa mós lei kona-bá organizasaun kriminál nian, ba komandante sira iha munisipiu liu-liu bá komandante eskuadra ho seksaun sira, nune’e bele intende lei ne’e, atu labale iha sala kompreensaun.

Jornalista: Rogério Pereira Cárceres