Konsellu Ministru Mós “Kontra-Malu” Kona-bá Desizaun Subsídiu $200

Hatutan.com, (05 Outubru 2022), Díli—Desizaun atu halo alterasaun dahuluk Dekretu-Lei númeru 37/2022, loron 25 fulan-maiu, kona-bá subsídiu “fim do ano” bá uma-kain sira, hetan mós pró no kontra entre membru Governu liuliu iha reuniaun Konsellu Ministru (KM).

Ministru Prezidensia no Konsellu Ministru (MPKM), Fidelis Manuel Leite Magalhães.

“Opiniaun krítika sira kona-bá dekretu-lei ne’e, la’ós de’it mai hosi sosiedade sívil sira, maibé iha governu laran rasik mós, iha hanoin katak, tenke iha pró-kontra bá diskusaun hirak ne’e. Nune’e mós iha Konsellu Ministru, durante diskusaun mosu pró ho kontra bá malu,” Ministru Prezidensia no Konsellu Ministru (MPKM), Fidelis Manuel Leite Magalhães hateten hafoin surumutu KM ordináriu iha Palásiu Governu, Kuarta (05/10/2022).

Lee Mós: Komisáriu Adjuntu CAC Husu Prezidente Repúblika Veta Alterasaun Dekretu Lei Subsídiu $200

Buat ne’ebé governu atu halo maka, naturalmente sei artikula di’ak liu tán ho Prezidente Repúblika, bainhira Xefe Estadu hanoin dehan katak di’ak liu altera ida-ne’e. Entaun, governu, naturalmente nakloke, tanba kontrolu politika ida ne’ebé mak Xefe Estadu iha.

“Primeiru Ministru mós dehan ona mai ami katak, importante tebes atu ita haree katak, intervensaun ne’e justu duni no ita fahe halo didi’ak. Bainhira presiza esklui karik, esklui sé, ho kategória saida,” Fidelis esplika.

Desizaun bá dekretu-lei ida-ne’e, oras-ne’e sei iha faze diskusaun nia laran no esbosu lei ka dekretu-lei ne’e mós, sei iha gabinéte Prezidénsia Konsellu Ministru, diskute hela kona-bá modalidade saida mak di’ak liu.

“Membrus Governu sira iha KM deside katak, hotu-hotu konkorda katak, bainhira simu osan, Ministru sira la simu. Ne’e klaru. Maibé, buat hirak ne’e tenke iha konsiénsia. Ministru sira iha desizaun iha ne’ebá, hotu-hotu dehan ita ministru, ita la presiza simu $200,” nia subliña.

Nia rekoñese katak, antes ne’e halo duni alterasaun ba Dekretu Lei ne’e atu atribui ho forma universál tanba governu haree liu bá preukupasaun sosiál no ekonómika hosi populasaun sira. 

Antes ne’e Prezidente Repúblika, José Ramos-Horta deklara ona katak, sei la simu subsídiu $200 no prefere atu oferese ba ema vulnerável sira.

Antes ne’e mós iha ona rekomendasaun hosi parte sosiedade sívil inklui Provedoria dos Direitos Humanos e Justiça (PDHJ) ho Comissão Anti Corrupção (CAC) katak, subsídiu “fim do ano” ho montante $200 ne’e tenke atribui bá familia sira ne’ebé vulnerável, la’ós bá ema hotu-hotu.

Iha Kuarta (28/09/2022), governu liuhosi reuniaun ordináriu KM aprova projetu Dekretu-Lei ne’ebé aprezenta hosi Vise-Primeira Ministra no Ministra Solidariedade Sosiál no Inkluzaun Armanda Berta dos Santos, bá alterasaun dahuluk Dekretu-Lei númeru 37/2022, loron 25 fulan-maiu, kona-bá subsídiu “fim do ano” bá uma-kain sira.

Ho intervensaun lejislativa ida-ne’e, governu deside katak subsídiu $200 ne’e sei atribui universalmente ka oferese bá uma-ka’in hotu-hotu iha territóriu nasionál.

Jornalista: Rogério Pereira Cárceres